میلے میل دا ذریعہ

پراݨیاں یاداں

ڳالھ تاں عام ھے" میلے میل دا ذریعہ ہوندے ھِن" بھلا اس ڳالھ اچ بہوں راز لُکے ہوئے ھِن۔ میلاں دے فیدے تے ثمرات اݨ گݨت ہوندے ھِن۔ میکوب یاد ھے بابے نال میلہ ڈیکھݨ ویندے ہاسے مٹی تے لکڑ دے کھڈوݨے گھن کے جتنی خوشی تھیندی ھئی اوندے واسطے لوظ نیں لبھدے۔ میلے دے وچ کھڈوݨاں دیاں ہٹیاں، کہاݨیاں دیاں کتاباں دے سٹال، آپݨے ناں دے سٹکر، نکے نکے ورقاں تے چمبڑݨ آلے اقوال زریں، میندی دے ڈیزائناں آلے ٹھپے ساڈی توجہ دا مرکز ہوندے ھَن۔ شریݨی، جلیبیاں، تلے بدھی، گوندھی، توشہ، رس ڳلے، سموسے، پکوڑے، پُلا تے زردے بہوں شونق نال کھاندے ہاسے تے انھاں ہٹیاں تے بہوں رش ہوندا ھئی۔ فالاں آلے طوطے تے ہتھ دی تلی ڈیکھݨ آلے جوگی لوکاں کوں ھکے لاظے دے وچ امیر کبیر بݨݨ دے خواب ڈکھیندے بیٹھے ہوندے ھَن۔ پھکیاں، سرمے تے ونکو ونک دے داروں ویچݨ آلے آپݨی آپݨی شئیاں دیاں صفتاں گاندے بیٹھے ہوندے ھَن۔ ھکے داروں نال پنڈے دے سارے مرضاں دا علاج کرݨ دے دعوے کریندے ھَن۔ کئیں پاسوں ڳاوݨ ڳاوݨ دے الا ساڈے کناں کوں آپ دو چھِکا۔ کئیں پاسوں بھولوں نچاوݨ آلے دی ڳڈولی وَجی۔ ھک پاسوں واھی راھی دے سامان آلے بیٹھے ھن ترینگل، کرائہاں، ڈاتریاں، رمبے، پہوڑے، بیلچے، کئیہاں تے وہولے ہر شئے اتھاں موجود ھئی۔

ھک پاسوں جھولے لگے کھڑے ھَن تے ہر کوئی خوش تھی جھوٹدا ودا ہوندا ھئی۔ اساں بیٹھے چڈول تے بس کیا ڈساں ڈر کول ساڈیاں چیکاں نکھتیاں روندے باکدے ویلہ پورا تھیا تے اساں تلے لتھے۔ تھوڑا اگوں تے گئے تاں تھیٹر ھن، دول سگدے کھڑے ھن لوک نچدے ڳاندے ودے ھن. ڈرامے تے کھل گپ ھئی۔ موت دا کھوہ ساڈے واسطے ھک بہوں حریاݨی آلی جھا ھئی سکوٹر آلا چلیندے چلیندے ہتھ چھوڑ ڈیندا ھئی تے لوکاں کول پیسے وی گھندا ودا ہوندا ھئی.

اوں ویلے تاں ساکوں میلہ ھک سیل دا ذریعہ لگدا ھئی۔ ھُݨ سمجھ آندی ھے جو میلے تاں بہوں ضروری شئے ھن. میلاں دے وچ سارے سکے سورھے، سنگتی، بیلی اکٹھے تھیندے ھن. کئی کئی سال ناں ملݨ آلے لوک وی اتھاں مل ویندے ھن۔ بہوں سارے لوکاں کوں روزگار ملدا ھئی۔ محبتاں ودھدیاں ھن. نفرت گھٹ تھیندی ھئی۔ امن امان دی فضا قائم راہندی ھئی. لوکاں دے وچ مثبت سوچ دا ودھارا تھیندا ھئی۔ منفی سوچ گھٹدی ھئی۔ ساکوں ولا اوھے میلے اوھے اکٹھ بحال کرݨ دی لوڑ ھے۔

غفار تعبیر