میلہ ڄیٹھہ بُھٹہ
اساݙے علاقے ءِچ میلے تاں ڈھیر سارے تھیندن پر ڄیٹھے بھٹے دا وݙا میلہ ہوندا ہا ۔ ترائے ݙینھ شہر سج ویندا ہا ، ہر جاہ تے مٹھائی دیاں دکاناں لڳ ویندیاں ہَن ، جلیبی تے لݙو عام ہوندے ہَن ،ڄیٹھے بھٹے دا دربار شہرکنوں کجھ پروبھرا ہا ،چار پنج میل تے ہا، پر ایویں لڳدا ہا جو شاہر تے دربار ڳنڈھیا کھڑے ۔میلے تے موت دا کھوہ ، سرکس ،کوݙیاں ، کشتیاں تے ٻیاں وی ڈھیر ساریاں کھیݙاں ہوندیاں ہَن ۔سرکس ءِچ نٹیں دا تماشا ہوندا ہا تے گلوکارڳاوݨ وی ڳمدے ہَن ،خسرے وی نینگریں دے دِل وِندلیندے ہَن ۔ میلے ء ِچ ٹھڳ وی ہوندے ہَن ،ڳنڈھ کپ عام ہوندے ہَن تے ایجھے سانگ رچاوݨ آلے وی ہَن جیرھے آنے ݙو آنے دی ٹکٹ لا تے ہوکا ݙیندے ہَن جو ہک آنے ءِچ رنگی دے رنگ ݙیکھو ۔کپڑے دا پردہ بݨائی کھڑے ہوندے ہَن ، اندر جیرھا بندہ ویندا ہا کِھلدا اَمدا ہا ،پر ٻے کوں کُئی ڳالھ نہ ݙسیندا ہا ۔ ایویں سارا ݙینھ راٻا لڳا رہندا ہا ۔ اساݙی وستی آلے مرچیں دیاں پنیریاں رہیندے ہَن جو پنیری ویچ تے میلے تے ویسوں ، اسیکوں میلے کیتے ہک روپیہ ملدا ہا ،میلے تے پیریں ویندے ہاسے ،سب توں پہلے پھاٹک تلے ٻیٹھے ہوئے چاچا مکھݨ اوجھری آلے کنیں روٹی ونڄ کھمدے ہاسے ۔چار آنے ءِچ اوجھری دی پلیٹ تے نال روٹیاں ، چار آنے دا کئی کھݙاوݨا تے اَٹھ آنے دیاں جلیبیاں گھندے ہاسے ۔ اَٹھ آنے دیاں جلیبیاں اتنیاں ملدیاں ہَن جو سارے گھر آلے کھمدے ہَن تے بچ وی پمدیاں ہَن ۔میلے تے خلقت ڈھیر ہوندی ہئی ، بزاریں ءِچ وی رش ہوندا ہا ،پر کجھ ہُتھرے چھوکرے ہمتے پاسے گھسیندے ہَن ، مونڈھے مریندے ہَن تے اَنڈیاں مریندیہَن ۔کئی لوک منہ دے بھرݨے ڈھاندے ہَن ۔اَنڈیاں مارݨ آلے ݙند پٹ تے تراہکے مریندے ہَن ۔اُچ تے چنݨ پیر دے میلے دی وݙی ہوک ہوندی ہئی پر کݙاہیں ونڄ نہ سڳیوسے ۔ اساݙے علاقے ءِچ میلہ شیخ عبدالستار ، بلند شاہ ، ݙاݙا گجݨ درویش تے اساݙی وستی ءِچ محمد شاہ بخاری دا میلہ تھیندا ہا ۔
حوالہ
[لکھو | ماخذ وچ تبدیلی کرو]کتاب: مُہاڳ، مصنف: ظہور احمد دھریجہ ، ناشر: جھوک پبلشرز ، ملتان