میر ہزار خان کھوسو

میر ہزار خان کھوسو ہک پاکستانی قاضی تے 25 مارچ توں 5 جون 2013ء تک نگران وزیر اعظم پاکستان رہے۔ میر ہزار وفاقی شرعی عدالت دے چیف جسٹس تے پاکستان دے عبوری وزیر اعظم وی رہے۔

ابتدائی زندگی

میر ہزار خان بلوچستان دے ضلع جعفر آباد دے قصبے اعظم خان وچ 30 ستمبر 1929ء کوں ڄمیے ہن۔ 1954ء وچ سندھ یونیورسٹی توں گریجویشن کیتی تے ݙو سال بعد کراچی یونیورسٹی توں وکالت دی ڈگری حاصل کیتی۔

عدالتی کیریئر

کھوسو، جیہڑے اپݨی سادگی دے کیتے مشہور ہن، نے 1957ء وچ اوں ویلے دے مغربی پاکستان کراچی بنچ دے ہک وکیل دے طور تے اپݨے پیشہ ورانہ کیریئر دا آغاز کیتا تے بعد وچ 1980ء وچ سپریم کورٹ دے وکیل بݨ ڳئے۔ ولا انہاں کوں 1977ء وچ بلوچستان ہائی کورٹ دا جج بݨایا ڳیا تے انہاں نے اڳلے ݙو سال تک ایں عہدے تے کم کیتا۔ مارچ 1985ء وچ انہاں کوں اضافی جج دے طور تے مقرر کیتا ڳیا تے 1987ء وچ صوبائی ہائی کورٹ دا مستقل جج بݨایا ڳیا۔ ولا 1989ء وچ انہاں کوں چیف جسٹس بلوچستان ہائی کورٹ بݨایا ڳیا۔ انہاں کوں ݙو دفعہ مختصر مدت کیتے نگران گورنر بلوچستان وی بݨایا ڳیا، پہلی وار 25 جون توں 12 جولائی 1990ء تک تے ݙوجھی واری 13 مارچ 1991ء توں 13 جولائی 1991ء تک۔ ہائی کورٹ توں ریٹائرمنٹ دے بعد اوہ وفاقی شرعی عدالت دے جج مقرر تھئے تے 1991ء وچ وفاقی شرعی عدالت دے چیف جسٹس بݨائے ڳئے۔ اوہ 1994ء تک ایں عہدے تے فائز رہے۔ انتہائی ایماندار ہووݨ دی وجہ توں انہاں کوں زکوٰۃ کونسل دا چیئرمین مقرر کیتا ڳیا۔ زکوٰۃ کونسل دے چیئرمین ہووݨ دی وجہ توں انہاں نے لمبے عرصے تک سیاست توں کنارہ کشی اختیار کیتی۔

وزیر اعظم پاکستان

الیکشن کمیشن نے میر ہزار خان کھوسو کوں 24 مارچ 2013ء کوں پاکستان دا 18واں وزیر اعظم منتخب کیتا۔ الیکشن کمیشن نے حکومت تے حزب اختلاف دے چار ناویں وچوں انہاں دا انتخاب کیتا۔

ذاتی زندگی

میر ہزار خان دے ترائے پُتر ہن: شفاقت کھوسو، برکت کھوسو تے امجد کھوسو۔ انہاں دے پتر امجد خان کھوسو نے پاکستان تحریک انصاف وچ شمولیت اختیار کیتی ہے۔

وفات

میر ہزار خان کھوسو کوئٹہ دے نجی ہسپتال وچ 92 سال دی عمر وچ 26 جون 2021ء کوں انتقال کر ڳئے۔ انہاں کوں کوئٹہ توں بذریعہ ایمبولینس درگاہ کٹبار شریف ڳھن ڳئے، جتھاں درگاہ دے ڳدی نشین میاں محی الدین نے انہیں دی نماز جنازہ پڑھائی۔ انہاں کوں انہاں دے آبائی قبرستان وچ سپرد خاک کیتا ڳیا۔ خاندانی ذرائع دے مطابق میر ہزار خان کھوسو پچھلے ہک مہینے توں شدید علیل ہن تے کوئٹہ دے نجی ہسپتال وچ زیر علاج ہن۔ میر ہزار خان کوں پچھلے ݙینہہ دل دا دورہ پیا، جیندے بعد اوہ کوئٹہ دے نجی ہسپتال وچ انتقال کر ڳئے۔