میر علی مراد خان تالپور مجروح

میر علی مراد خان میر سہراب دے فرزند ہن۔ آپ1815ء وچ پیدا تھئے۔ میر سہراب خان دی وفات دے بعد ریاست دی حکمرانی وصیت نامے دے مطابق وݙے لڑکے میر رستم خان کوں ملی۔ کجھ عرصہ بعد میر رستم خان دی چارلس نیپئر نال نہ بݨی۔کیوں جو او انگریزاں کوں غاصب سمجھدے ہن۔ مجبوراً انھاں کوں میر علی مراد دے سپرد تخت و تاج کرݨا پیا۔ میر علی مرادانگریزاں دی طرف داری کریندے ہن۔ مگر بعد وچ انگریز سرکار نال وی انھاں دی اَݨ بݨ تھی ڳئی۔ میر علی مراد کوں تعلیمی ترقی دا ٻہوں شوق ہئی۔ او شعر و ادب تے موسیقی دے دلدادہ ہن۔ فارسی ‘ سندھی تے سرائیکی زباناں وچ شاعری کریندے ہن۔ آپ جنوری 1894ء مطابق 1311ھ وفات پاتی۔ انھاں کوں کربلائے معلی دفن کیتا ڳیا۔ (28)

نمونہ کلام ۔ کافی:

اَڄ عید ہر گھر یار وے

آ مل میݙا دلدار وے

رُت آئی مانگھ بہار دی

بلبل ہزار پکار دی

ساکوں تانگھ ہے ولݨ یار دی

گل پھل نظر وچ خار وے

پھل ہار پا کے سہیلیاں

سہجوں پھرن اربیلیاں

میں مٹھڑی میل کچیلیاں

نی بھاندا ہار سنگھار وے

بن دید کیڑھی عید ہے

بن یار عیش بعید ہے

دوئی دا درد مزید ہے

گویا عذاب النار وے

سکھ سُتیاں کنٹھے والیاں

اساں ݙکھیاں راتیں جالیاں

مجروح درد دیاں ڳالہیاں

ہک دل تے درد ہزار وے

حوالہ

کتاب: سرائیکی شاعری دا اِرتقاء، مصنف: ڈاکٹر نصراللہ خان ناصر، چھاپہ خانہ : جھوک پبلشرز ملتان