میاں محمد اظہر

میاں محمد اظہر
مناصب
لاہور دا میئر
برسر عہدہ 1987  – 1991
گورنر پنجاب
برسر عہدہ 1990  – 1992
صدر پاکستان مسلم لیگ (ق)
برسر عہدہ 1999  – 2002
معلومات شخصیت
شہریت	پاکستان
جماعت	پاکستان مسلم لیگ (ن)
عملی زندگی
کم	سیاست دان
ماء ٻولی	اردو
پیشہ ورانہ زبان	اردو

پاکستان مسلم لیگ (قائد اعظم) دے صدر اتے کنگز پارٹی دے ہک ٻہوں وݙے رہنما میاں محمد اظہر نے اپݨی سیاسی زندگی دا آغاز سٹھ دے ݙہاکے دے اخیر وچ ہک عام سیاسی کارکن دی حیثیت نال کیتا اتے انوی سو ستر وچ تھیوݨ آلے عام انتخابات وچ سابق کرکٹر اتے پاکستان پیپلز پارٹی دے امیدوار عبد الحفیظ کاردار دی انتخابی مہم وچ ودھ چڑھ کے حصہ ڳھدا۔

سقوط ڈھاکہ دے بعد ذوالفقار علی بھٹو دی سربراہی وچ قائم تھیوݨ آلی حکومت اتے ضیاالحق دے مارشل لا دور وچ اگرچہ میاں اظہر دا کوئی سیاسی کردار تاں نظر نئیں آندا پر آکھیا ویندے جو انہاں ارائیں برادری دے تعلق کوں استعمال کریندے ہوئے شریف خاندان کوں انہاں دے قومیائے ڳئے صنعتی یونٹ واپس ݙیواوݨ وچ اہم کردار ادا کیتا ہئی۔

جنرل ضیاالحق نے سیاسی جماعتاں کوں کمزور کرݨ کیتے جݙاں بلدیاتی نظام دا ݙال ݙتا تاں اوہ ایندا حصہ بݨ ڳئے۔ سن انوی سو اناسی اتے تریاسی وچ تھیوݨ آلے انتخابات دے نتیجے وچ میاں شجاع الرحمٰن لاہور دے میئر بݨے پر سن انوی سو ستاسی وچ قرعہ ارائیں برادری نال تعلق رکھݨ آلے میاں اظہر دے ناں نکلیا۔

لاہور دا میئر بݨݨ دے بعد انہاں میرٹ کوں ٻہوں اہمیت ݙتی اتے تجاوزات دے خلاف ہک کامیاب مہم چلائی۔ اوں ویلے دے وزیر اعلیٰ نواز شریف دے ہک مامے ہال روڈ تے سرکاری زمین تے ناجائز تعمیر کر رکھی ہئی اتے پورے لاہور دی اکھ ایں ڳالھ تے لڳی ہوئی ہئی جو میاں اظہر ایں چیلنج نال کیویں نبر آزما تھیندن۔ میاں اظہر نے اپݨی شہرت دے مطابق عمل کیتا اتے اوں ناجائز عمارت کوں منہدم کروا ݙتا۔

میاں اظہر کوں سن انوی سو نوے وچ پنجاب دا گورنر بݨا ݙتا ڳیا اتے اوہ ترائے سال تائیں ایں عہدے تے فائز رہے۔ نواز شریف حکومت دے خاتمے دے بعد انہاں وی استعفیٰ ݙے ݙتا۔ بعد وچ جݙاں سپریم کورٹ نے اسمبلی کوں بحال کیتا تاں میاں اظہر کوں بطور گورنر اتے پرویز مسعود کوں بطور چیف سیکریٹری پنجاب کوں ’فتح‘ کرݨ کیتے بھیڄیا ڳیا۔

پر انہاں کوں ایں وچ کوئی خاص کامیابی حاصل نہ تھئی اتے جݙاں نواز شریف اتے غلام اسحاق خان وچ تصادم دی کیفیت پیدا تھئی تاں اوہ بغیر کہیں مزاحمت دے گورنر ہاؤس چھوڑ تے سنت نگر چلے ڳئے۔ سن انوی سو ترانوے وچ نواز شریف نے قومی اسمبلی دے ݙو حلقیاں توں کامیابی حاصل کیتی اتے انہاں دی خالی کردہ نشست توں میاں اظہر نے ضمنی انتخاب لڑیا اتے جیت تے حزب مخالف وچ رہے۔

انوی سو ستانوے وچ تھیوݨ آلے عام انتخابات وچ میاں اظہر نے لاہور دے مضافات شاہدرہ توں قومی اسمبلی دا الیکشن لڑیا اتے کامیابی حاصل کیتی۔

مسلم لیگ حکومت دے ݙوجھے دور وچ انہاں اے آکھݨ شروع کر ݙتا جو کارکنوں دے کم نئیں تھیندے پئے۔ انہاں دی ایں تنقید دے بعد پنجاب دے وزیر اعلیٰ نے پنجاب سول سیکریٹیریٹ وچ انہاں کوں ہک دفتر ݙتا تاں جو اوہ کارکنوں دے کم کروا سڳن۔

میاں اظہر نے اپݨی دھی دی شادی تے اوں ویلے حزب اختلاف دی قائد بینظیر بھٹو کوں مدعو کیتا جییندا شریف خاندان نے ٻہوں برا منایا۔ ایں وجہ توں فاصلے ودھدے ڳئے اتے ایندی انتہا اوں ویلے تھئی جݙاں انہاں علانیہ بغاوت کر ݙتی اتے اپݨے سنت نگر دے گھر وچ ڈیرا لا ڳھدا۔

کارکنوں دے حقوق کیتے آواز بلند کرݨ تے انہاں کوں ٻہوں پزیرائی ملی اتے مسلم لیگ دے کارکنوں نے ملک بھر توں انہاں دے دفتر آوݨ شروع کر ݙتا۔ بعد وچ انہاں کوں نواز شریف دے پیو میاں شریف نے طلب کیتا اتے خاموش کرا ݙتا۔

نواز شریف حکومت دے آخری ݙیہاڑے وچ انہاں خورشید محمود قصوری، غلام سرور چیمہ، سکندر ملہی، فخر امام، عابدہ حسین اتے میاں منیر دے نال رَل تے ہم خیال گروپ بݨایا۔ اے گروپ نواز شریف حکومت دے خاتمے دے بعد وی قائم رہیا اتے ودھ ارکان اسمبلی نے ایں گروپ وچ شمولیت اختیار کر ڳھدی۔

جݙاں نواز شریف نے اپݨی مرضی نال پاکستان مسلم لیگ دے مجلس عاملہ دے ارکان دے ناواں دا اعلان کیتا تاں گجرات نال تعلق رکھݨ آلے چوہدری شجاعت حسین اتے پرویز الٰہی کوں مسلم لیگ توں علیحدگی دا بہانہ مل ڳیا اتے ایں ہم خیال گروپ دی کوکھ توں مسلم لیگ (قائد اعظم) نے جنم ڳھدا۔

انہاں دے ناقدین دا آکھݨا ہے جو میاں اظہر دا سیاست وچ عروج شریف خاندان دے مرہون منت ہے پر انہاں کوں جݙاں موقع ملیا انہاں وفاداریاں بدلݨ وچ دیر نئیں لائی۔ انہاں دا اے وی آکھݨا ہے جو اوہ شریف خاندان دی بدعنوانی تے تاں ٻہوں تنقید کریندن پر خود انہاں دے خاندان نے پنجاب حکومت دی ملکیتی ہک شوگر مل ٻہوں سوکھیاں شرطاں تے حاصل کیتی۔

انہاں دے ناقدین اے وی آکھدے سُݨے ڳئے جو اوہ سیاست وچ ہک خاندان دے عمل دخل دے خلاف ہن پر انہاں کوں جیویں ہی موقع ملیا اوہ اپݨے بھرا میاں اشرف اتے قریبی عزیز ناصر جبران کوں انتخابی میدان وچ ڳھن لائے۔

انہاں تے اے وی الزام ہے جو اوہ نواز شریف دے دور وچ کارکنوں دے حقوق دے ٻہوں وݙے داعی ہن پر موجودہ انتخابات وچ جݙاں ٹکٹاں دی تقسیم دا مرحلہ آیا تاں انہاں دی کارکنوں نال ہمدردی دا عکس کتھائیں وی نظر نئیں آیا۔