میاں بکھا

حضرت میاں بکھا

میاں بکھا دا اصل ناں میاں برخوردار تے ذات دا بھروانا ہے۔ ایہناں دا مزار موضع شہابل تحصیل و ضلع جھنگ وچ ہے۔ایس دے دروازے تے عدل جہانگیری دیے ٹل لگے ہوئے ہن جیہناں نوں کھڑکا کے لوکی اندر وڑدی ہے۔پورے جھنگوچی وسیب وچ کوئی جھیڑا جھگڑا ہووے، چوری چکاری ہووے، پرھیں پنچایت توں گل نہ مُکے تے آخیر گل سونہہ تے مُکدی ہے، ایس وسیب وچ مُکرے ہوئے، کوڑے یاں چور نوں اپنی صفائی دیون کان سونہہ ایس دربار میاں بکھا دی دسی جاندی ہے، ایس کان مدعی بوہے دا کُنڈا دینا تے ملزم کھولنا ہوندا ہے۔لوکائی دا خیال ہے تے کئی روایتاں وی موجود ہن جوں کوڑی سونہہ میئیں بکھے دی کوئی نہیں چیندا، جیس کسے کوڑی سونہہ چائی چالھی دناں وچ سونہہ پھٹ جاندی ہے تے ایہہ فقیر اوس دے پلے کائی شے نہیں چھڈدا، ایس وسیب وچ ایہہ وی روایت ویکھن نوں ملی ہے کہ لوکی قرآن دی سونہہ چاونا تاں قبولدے ہن پر میئیں بکھے دی سونہہ نہیں قبولدے، کئی بے گناہ لوکی ڈگری ہویا مال بھر دیندے ہن پر ایس دربار دی سونہہ نہیں چیندے، ایس کان باقاعدہ محکمہ اوقاف ولوں دربار تے سونہہ چاون تے چواون کان شرطاں وی لکھیاں ہوئیاں ہن، سونہہ چاون والے بندے نوں متولی ولوں اِک حلف نامہ دتا جاندا ہے، جیہڑا بندہ اِک واری سونہہ دے چھڈے مُڑ اوس تے کسے قسم دا شک نہیں کیتا جاندا، ایس توں ڈاڈھا ویہار جھنگوچی وسیب وچ شاید ای کدے ہووے، تھانے وچوں وی انکوائری ویلے ایس دربار دی سونہہ تے راضی نامہ ہو جاندا اے، کیوں جے دوویں دِھراں ایس ویہار تے راضی ہو جاندیاں ہن۔ ایس دور دے وچ نیاں دا سوکھا تے سولّا طریقہ شاید ای کدے ہووے۔ایس وسیب وچ صرف ایسے دربار دی سونہہ منی جاندی ہے۔

جیس زنانی دی اولاد پوری ہو جاوے اوہ دربار تے جا کے جندرا مار چھڈدی تے کُنجی اوتھے ای رکھ چھڈدی ہے، ایس دا مطلب اگے ہور اولاد نہ ہوسی، جیہڑی کسے زنانی تے اولاد نہ ہووے اوہ جندرا مارن آلی زنانی کولوں کُنجی منگ وی لیندی ہے جوں جندرا لاہیاں مینوں رب سنبھال لوے تے اولاد دیووے،

ایس توں اڈ مال ڈنگر دی خیر کان وی منتاں منیاں جاندیاں ہن۔

لکھت: فیصل جپّا