مہر اجمل خاموش

اصل ناں      محمد اجمل

قلمی ناں       مہر اجمل خاموشؔ  

جمن         1976ء    

فون نمبر      03027372538

جاہ پتہ       مہر لاج ،سادات کالونی بوسن روڈ ملتان

گورنمٹ ہائی سکول شمس آباد دے سابق ہیڈ ماسٹرمہر گُل محمد( مرحوم) نال کیوں جو میڈی نیاز مندی ہئی۔غالباََ 1988ء وچ انہاں میکوں اپنی کتاب ’’پاکستان میں پرائمری تعلیم‘‘عنایت کیتی،تے ول محبت دا ایہ رشتہ تا حیاتی انہاں نال قائم ریہا۔مہرصاحب ہک بہوں وڈی علمی و ادبی شخصیت ہن۔میر غلام حسن خان حیدرانی دے سرائیکی افسانے انہاں دی وفات دے بعد شائع کر کے مہر صاحب بہوں وڈا کارنامہ سر انجام ڈتاہا تے سرائیکی دانشوراں دے دل جیت گھدے ہن۔اللہ تعالیٰ مہر صاحب کوں جنت الفردوس اچ اعلیٰ مقام و مرتبہ عطا کرے۔

جتھوں تک اجمل خاموش دا تعلق ہے تاں ایہ مہر گُل محمد دے سکے بھتریجے ہن۔کیوں جو مہر صاحب دی اولاد کائنا ہئی ،تہوں انہاں خاموش صاحب کوں اپناں پتر بنایا ہویا ہا۔جیڑھے جو اجکل انہاں دی قلم تے جائیداد دے وارث ہن۔شاعری دے حوالے نال اجمل خاموش ہک پُر گو،مشاق شاعر ہے۔ہُن تائیں آپ دیاں ایہ چار کتاباں ،دل دی مرضی،درداں دا کشکول،،تانگھ تے پلکاں ہیٹھ چناں،چھپ چکیاں ہن۔آپ دا غزلیہ کلام بطور نمونہ حاضر ہے۔

غزل

نین تیڈے تلوار وے سانول         نہ مویاں کوں مار وے سانول

تیڈیاں مَنتاں دیون کیتے          گئی آں ہر دربار وے سانو ل

پیار پریت اچ ٹھیک نئیں ہوندا        نت نت دا نروار وے سانول

آس دی بیڑی اللہ سوہناں         لیسی آپے پار وے سانول

عشق اولڑے دے وچ عاشق         بھُل جاندے گھر بار وے سانول

توں جتیوں تے جیت ہے تیری        گئے خاموشؔ ہن ہار وے سانول