مِڈھ رانجھا

ضلع سرگودھا دی تحصیل کوٹ مومن دا قصبہ ۔ کوٹ مومن توں مشرق آلے پاسے 19 کلو میٹر جݙاں جو سرگودھا شہر توں شمال مشرق آلے پاسے 54کلو میٹر دے فاصلے تے دریائے چناب دے کنارے تے واقع ہے۔ ایندے مغرب اِچ بکھو والہ شمال مغرب اچ نصیرپور رانجھا، مشرق اچ دُلے آلا، شمال مشرق اچ اُبل میری وال تے جنوب اچ چک سلیمان تے کھنب کہنہ دے دیہات واقع ہن۔

ایندی ابتداء دے متعلق ݙو روایتاں مشہور ہن۔ ہک اے جو کئی سوسال پہلے رانجھا قبیلے دے مِڈھ نامی شخص آباد کیتا ہا۔ جݙاں جو ݙوجھی روایت دے مطابق ایکوں رانجھا خاندان دے مرکز ہووݨ دی وجہ نال ’’مُڈھ رانجھا‘‘ آکھیا ڳیا۔وَل اے وِگڑ تے مِڈھا رانجھا تھی ڳیا۔اتھاں طلباء تے طالبات دے گورنمنٹ ہائر سیکنڈری سکول، نیشنل بنک دی برانچ، ڈاکخانہ، بنیادی مرکز صحت ، تھانہ، انگریز دَور دا تعمیر کردہ بنگلہ، شفاخانہ حیات، ٹیلیفون ایکسچینج ،کواپریٹو سوسائیٹیز تے NRSPدا دفتر موجود ہے۔ ہک مین بازار ہک سگریٹ فیکٹری تے برف دے کارخانے وی ہن۔ کنڑک، چاول، گنا، مکئی ،کِنوں، لیچی، امرود وغیرہ اتھاں دیاں اہم پیداوار ہن۔ایندی آبادی 25ہزار دے نیڑے ہے۔ علم و ادب دے حوالے نال مہر نذیر احمد نظیر، سید احمد چنابی، منظور احمد ہاشمی ، میاں احمدتے طارق محمود دے ناں نمایاں ہن۔ منظور احمد ہاشمی دا پنجابی شعری مجموعہ ’’پھلا دا دریا‘‘ شائع تھیا۔ جݙاں جو میاں احمد دی کتب مِینے، بارہ امام اور منقبت شائع تھیاں۔ مہر نذیر احمد نظیر دا شعری مجموعہ چنّاں دیاں چھلاں زیر طبع ہے۔ او نظیر ادبی سنگت مڈھ رانجھا دے بانی وی ہن۔