مِٹھے خان بلوچ
اساݙی وستی دے نال چاکی دا کھوہ ہے ۔ اُتھاں جمالیں دی وستی ہے۔ دیرہ غازی خان دے علاقے دا مِٹھا خان بلوچ اُتھائیں راہندا ہا، شئیت او اپݨے علاقے ءِچوں لڑ تے آیا ہا ۔مِٹھا خان بلوچ سرائیکی پرست ہا ، جھمر ݙاڈھی سوہݨی کھیݙدا ہا ، سب توں وݙی ڳالھ اے ہے جو بھٹو دا دیوانہ ہا ۔اساݙے کول اَمدا ہا تاں ݙاڈھے شوق نال اخبار سسُݨدا ہا ، آپ پڑھیا ہویا کائنا ہا ، ہر خبر تے تبصرہ کریندا ہا ۔ اخباریں آلے زیادہ تر بھٹو دے خلاف لکھدے ہَن ، خبر پڑھ تے ہنائیں کوں مندے ݙیندا ہا ۔بھٹو دے بیان تے ٹھر ٹھر ویندا ہا ۔مساوات اخبار شروع تھیا تاں مٹھا خان بلوچ اصلوں آسرا نہ کریندا ہا ۔ منہ اندھارے کوں سویلے پیدل خان پور ویندا ہا ، تے مساوات اخبار گھن تے ، پیدل آ ویندا ہا ،سارا ݙینھ خبراں پڑھیندیاں ہَن ، تبصرے تھیندے ہَن ۔مٹھے خان کوں کجھ لوک ڄاݨ تے وی چھڑیندے ہَن پر مِٹھا خان اصلوں رعایت نہ کریندا ہا، کاوڑ کنوں رنگ رَتا لال تھی ویندا ہَس ، تے مندیں تے آ ویندا ہا ۔الیکشن دے ݙینھ آ ڳے ہن امیدوار اپݨے گاݙیں تے جھنڈے لاتی ودے ہوندے ہن، پیپلز پارٹی دے جھنڈے آلی جیپ کوں امدا ݙٹھس پرے ودا ہا ،بھڄدا آیا، اڳوں ونڄ آلا وگھہ ریج پیا ہا ، اُٻاہل کنوں ریج آلی زمین ء ِچوں سدھ کیتس تے گپ گپیج ڳیا، اساں جیپ کوں ہتھ ݙتا رُک ڳی ،اساں ہنائیں کوں ݙسیا ، ایم پی اے دے امیدوار میاں نور الرحمن دی جیپ ہئی ۔مٹھہ خان گپڑ ء ِچ آکھدا کھڑا ہا، بھٹو زندہ باد۔بھٹو زندہ باد۔
حوالہ
[لکھو | ماخذ وچ تبدیلی کرو]کتاب: مُہاڳ، مصنف: ظہور احمد دھریجہ ، ناشر: جھوک پبلشرز ، ملتان