مُنشی مُک مُکا تے مولوی بھن تروڑ دیاں ڳالھیں

ہوٹل دی میز تے اَڄ وَلا کفر اسلام دی لڑائی لڑیندی پئی ہئی‘ مولوی بھن تروڑ تے مُنشی مُک مُکا آپت اِچ آڑوٻٹ ہن ۔ ڳالھ شئیت چلی ہئی جماعت اسلامی دے ہک لیڈر دے بیان کنوں جیڑھا مردم شماری اِچ سرائیکی زبان تے قومیت درج کراوݨ بارے اُنہیں ݙتے اَتے اخباریں اِچ چھپئے ۔ ہِیں بیان موجب سرائیکی زبان تے قومیت درج کراوݨ دے سببُوں اسلام اَتے نظریہ پاکستان دی خلاف ورزی تھیسے۔

مُنشی مُک مُکا دا آکھݨ ہا جو مردم شماری اِچ پنجابی زبان ‘ سندھی زبان ‘ پشتو زبان ‘ بلوچی زبان اَتے پنجابی ‘ پشتو ‘ سندھی تے بلوچ لکھواوݨ نال تاں اسلام تے نظریہ پاکستان دی خلاف ورزی کائنی تھیندی ‘ خلاف ورزی وی ہوں ویلھے تھیندی اے جیڑھے ویلے زبان آلے خانے اِچ قومیت آلے خانے اِچ سرائیکی لکھیجے … ؟

مولوی بھن تروڑ جماعت اسلامی آلیں دی وَٹ گھدی ٻیٹھا ہا ! اللہ ڄاݨے دِلوں بجانوں یا اونویں مُنشی مُک مُک کوں چِڑاوݨ دی خاطر؟ اوندے آکھݨ موجب جیڑھے ویلھے اللہ نہ کرے اُنہاندے اَپݨے نظریہ پاکستان کوں کئی ‘خینس‘‘ پُڄدی اے تاں شودے جماعت آلیں کوں وݙی تکلیف تھیندی اے‘ اُنہیں دیاں کُوکاں تے دھاڑاںنِکل ویندن۔ مُنشی مُک مُکا چمِک پیا۔ مولوی بھن تروڑ کوں آکھݨ لڳا میکوں ایہ ݙسا ‘ آزادی دی تحریکیں دی تاریخ وی کݙاہیں پڑھی ہیوے؟ جیڑھے ہُݨ اسلام دے وݙے ٹھیکیدار تے پاکستان دے مامے بݨیئے ودّن‘ ایہے ہوں ویلھے کِتھاں ہَن ؟۔

جماعت بݨاوݨ آلے مولوی مودودی دیاں کتاباں پڑھو تاں پتہ لڳ ویسے ۔ رہ ڳیا’’ نظریہ پاکستان‘‘ تاں ایہ اُنہیں اپݨیاں دُھونوڑیاں دھوݨ کیتے آپ گھڑیا ہا ۔ جنرل یحییٰ خان آلے مارشل لاء اِچ جݙاں میاں طفیل محمد قوم کوں خوش خبری سُݨائی ہئی جو جسٹس کارنیلیس ہوریں اسلامی آئین جُڑیندے ٹھہیندے پِن جیڑھا یحییٰ خان لاڳو کریسے‘ جہاد کشمیر دے خلاف فتویٰ ݙتونے ہُݨ کشمیر دے ناں تے چندے وَدّے اُڳڑیندن تُوں اُنہیں کوں نِوھی ڄاݨدا اُنھیں وݙیاں گُرزبانیاں کھادِن ‘ خود اِنہیں دے وݙکے خیر نال وݙے ’’پِھڑتک باز‘‘ ہن لوڑ پَوے ہا تاں اَپݨے لکھیے تے آکھیے کنوں مُکرݨ تے پھرݨ اِچ دیر نہ کریندے ہَن ۔ مولوی بھن تروڑ اوندی ڳالھ ٹک تے آکھݨ لڳا تُساں لوک تاں ایہ وی نِوھے مَنیندے جو قائد اعظم ؒ پاکستان کوں اسلامی ریاست بݨواوݨ چہندے ہَن ۔

منشی مُک مُکا وَلدی ݙتی جو ایہ کوئی جھیڑے جھڳڑے آلی ڳالھ کائنی ۔ پاکستان بݨ وݨڄݨ دے بعد پارلیمنٹ اِچ قائد اعظم ؒ دی پہلی پہلی تقریر کنوں اُنہیں دے خیالات تے نظریات ظاہر تھی ڳے ہن۔ اوہیں ڳالھوں جو اُنھیں دی ایہا تقریر ہک لیکھے پالیسی سٹیٹمنٹ ہئی جیڑھی اُنہیں گورنر جنرل دے طور تے کیتی ہئی وَل اُنھیں دے عمل کنوں وی ایں ڳالھ دا ثبوت مِلدے جوایہو جہی ’’اسلامی ریاست‘‘ اُنھیں دے پروگرام تے ذہن اِچ ہرگز کائناں ہئی جیہو جہی جماعت اسلامی آلے تے ݙوجھے مُلاّں ملواݨے اَڄ کلھ سِتھری وَدِن اُنھیں دا عمل تاں ایہ ہا جو دنیا دی سبھ توں وݙی اسلامی مملکت دا وزیر قانون مولانا شبیر عثمانی یا مولانا مودودی کوں کائناں بݨایا ہانیں ‘ پاکستان دا پہلا وزیر قانون پتہ ہے کون ہا؟ ۔ ہک کِراڑ جوگندر ناتھ مَنڈل ہَا اَتے وزیر خارجہ پتہ ہے کون ہا؟ سر محمد ظفراللہ خان ‘ مرزا غلام احمد قادیانی (کوڑے نبی) داخلیفہ جئیں قائداعظمؒ دا جنازہ اِی کائناں پڑھیا ہا ایئیں ٻہہ ڳالھیں کریندو۔

حوالہ

ٻٹ کڑاک، مصنف: انیس دین پوری۔ ناشر: جھوک پبلشرز ملتان