مُلاں تاں نیندے دھاڑ وو

اپݨے سرائیکی وسیب اِچ کوئی بندہ اچاچیت کہیں ’’اَوِیہہ‘‘ اِچ آ ونڄے ۔ یا وِیری دے وَس پئے ونڄے تاں دَھاڑ دَھاڑ کریندے اَتے وَلوّ ووُئے لوکو! آکھ تے آپݨے بھرانویں سَکِّیں سَوڑِیں ‘ پَڑیچیں تے رَل وَسدِیں کوں امداد کرݨ کیتے سݙ مریندے ۔ کَنِیّں کَؤ پمدی اِینے تاں سبھے ہک ہک کر تے یا کٹھے تھی تے تکڑاتھیویں ‘ دِل ٻدھِیں ’’پُنوسے‘‘ آکھدِے بھڄ پمدِن۔ اِیئیں کہیں وَستی آلیں تے اوکھا ویلھا آ وے تاں او وی دھاڑ دھاڑ کرتے لوکیں کوں کٹھا کریندن‘ اسیݙے یار مُنشی مُک مُکا دا آکھݨ ایں جو او ’’کلہا‘‘ نہ پر اَساں سبھے اَوِیہہ دِے وَات اِچ آڳیوں۔ سَارا وسیب ’’ڳڑدَھال‘‘ اِچ اِے ۔ کیوں ڳڑدھال اِچ اے؟ اے ݙسا تے اُوں سبھنائیں کوں سَݙ مَارِیے:

مُلاّں تاں نِیندے دھاڑ وو

ائیں آکھ پاکستان دیاں

پاڑاں پٹیندے دھاڑ وو

ولو ووئے لوکو ! دھاڑ وو

ممبر تے چڑھ ‘ کھڑ ٻوکدے

ٻڑدھک مریندے دھاڑ وو

اَݨ پڑھ تے جاہل لوکیں کوں

بد راہ کریندے دھاڑ وو

’’کافر‘‘ ہے اے ’’کافر‘‘ ہے ’’او‘‘

فتوے جڑیندے دھاڑ وو

مُنکِر ہے پیر فقیر دا ……

روضے سڑیندے دَھاڑ وو

قبریں پَٹیندے پَٹ کراہیں

مُردِے کڈھیندے دھاڑ وو

بے بھرماں کر تے چوکیں تے

’’لڑکا‘‘ کھڑیندے دھاڑ وو

سڑکیں تے ’’بسّاں‘‘ جھل کراہیں

بندے بُھنیندے دھاڑ وو

’’لاچار‘‘ بے وس ’’ضعیفیں‘‘ کوں

دُرّے مریندے دھاڑ وو

’’مُچھّاں مُنائو‘‘ ݙاڑھیاں ودھائو

آرڈر کڈھیندے دھاڑ وو

کَندھیاں اُسارے کُوڑ دیاں

’’ورقے‘‘ سڑیندے ساڑ تے

’’رِمشا‘‘ پھسیندے دھاڑ وو

بانسیں کوں ٻاہیں ݙے کراہیں

بھانبھڑ مچیندے دھاڑ وو

’’حاکم‘‘ دے ہر دم نال ہے

’’پُوچھڑ‘‘ لُݙیندے دَھاڑ وو

’’اُتلُیں‘‘ دے آکھے لڳ کراہیں

جھیڑے پَویندے دَھاڑ وو

’’دَرسَاں‘ مسیتاں‘‘ کھول تے

’’ہٹیاں‘‘ وَدھیندے دھاڑ وو

ݙینہ رات ’’تُو تُو‘‘ کھول تے

نندراں پِھٹیندے دھاڑ وو

’’چندِے‘‘ اَڳوڑے رات ݙینہ

’’بینکاں‘‘ بھریندے دھاڑ وو

لوکیں کوں آپت وچ لڑا

’’حلوے‘‘ پِڑیندے دھاڑ وو

’’زردے‘ پُلاء‘‘ تے ’’قورمے‘‘

’’چرغے‘‘ چِریندے دھاڑ وو

’’گݙنہہ‘‘ کݙاہیں لبھدا نہ ہَس

’’کاراں‘‘ سوہیندے دھاڑ وو

’’ڈیزل‘‘ دے ٹینکر ویچ تے

’’نِسبے‘‘ کمیندے دھاڑ وو

مکے مدینے ٻہہ کراہیں

ہنڈیاں وِچیندے دَھاڑ وو

’’پڑھݨ‘ ونڄے ’’نِیاݨی‘‘ تاں ’’اے‘‘

گولیاں مریندے دھاڑ وو

’’تاثیر‘‘ دے ’’قاتل‘‘ دے ڳل

’’سہرے‘‘ پویندے دھاڑ وو

اَہدے ایہو ’’اسلام‘‘ ہے

’’تَراݙاں‘‘ مریندے دھاڑ وو

’’سچ‘‘ ’’کُوڑ‘‘ جے کوئی آکھے چا

آنہے کڈھیندے دھاڑ وو

حوالہ

ٻٹ کڑاک، مصنف: انیس دین پوری۔ ناشر: جھوک پبلشرز ملتان