مولوی اللہ بخش فدوی

آپ دا پورا ناں مولوی اللہ بخش ہئی۔ آپ فدوی تخلص کریندے ہن۔ آپ دا گھر دریا خان تحصیل بھکر وچ ہئی۔ بچپن وچ اِی آپ ڈیرہ اسماعیل خان دے مشہور عالم سید مرید حسین شاہ المعروف عون شاہ دے کول شاگرد تھی ڳے تے ساری حیاتی ڈیرہ اسماعیل خان وچ اپݨے استاد کول گزار ݙتی۔مولوی اللہ بخش فدوی ٻہوں عالم شخص ہن۔ فنِ موسیقی وی ڄاݨدے ہن۔ مجلس پڑھن دے فن وچ استاد منے ویندے ہن۔ زبردست سرودی سوز خوان ہن۔ انھاں دی وفات چوݙویں صدی دے شروع 6جمادی الاول 1351ھ مطابق 1883کوں تھی۔ چوݙویں صدی دے شروع دا تذکرہ چھیکڑی دور دے ہک شعر اِچ کریندن۔

تیرھویں صدیاں گزر ڳیاں لڳی ہے چوݙویں صدی

اڄݨ حسین ؑدے مارݨ کیتے لوک ودن کمراں ٻدھی

کلام دی ونکی۔

مرثیہ:

پردیس دی خوشی ہے غم

شالا کوئی نہ ہووے بے وطن

نہ تباہ ہووے او اُڄڑے بن

جیندی گزری وچ بادشاہی رتن

ٻانہے بہشتی جیندے ‘ تن اطہر دے زیب ہوون مدام

افسوس اوسدے تن کوں چالہی روز نہ ملیا دفن کفن

لہندی بہار دے وچ خزاں آوندی نہ دستور ہے

قربان اوس باغبان داجیندا اُڄڑ ڳیا پھلدا چمن

صبح کوں شہر بانو دے ویہڑھے باغ کھلیا ٻچڑیاندا

ڈھلدے ݙوپہراں تائیں تباہی ہو ڳیا سارا صحن

لٹوا کے گھر سارا شیر اُمت گناہگار بخشاوائی

فدوی حشر دا خطر کیا لڄ پال ہے شاہ زمن

مولوی اللہ بخش فدوی دیرہ اسماعیل خان دے وسوں واݨ ہن۔ آپ نے اوں وقت دے ہک ٻہوں وݙے ذاکر سید مرید حسین بموں شاہ توں فنِ ذاکری دی تربیت حاصل کیتی۔ فدوی نیک سیرت تے درویش صفت آدمی ہن۔ آپ دا شمار تیرھویں صدی دے نامور مرثیہ گو شاعراں وچ تھیندے۔ فدوی 1243ھ دے نیڑے تیڑے جمیے تے 6جمادی الاول 1301ھ ؍ 1883ء وچ اللہ سئیں کوں پیارے تھی ڳئے۔

نمونہ کلام :

فانی جہان بھروسہ نیں زندگانی دا

سو سال زندہ گر ریہے پیسی جام فانی دا

دنیا مثال ہے جیویں باب پاݨی دا

کل من علیہا فان امر حق سبحانی دا

عملاں دے ٻاجھ ہرگز نہ کجھ ویسیا

الفت سخی حسینؑ دی ہر جا چھڑیسیا

دفعہ شہادت حضرت عباس علیہ السلام وچوں حضرت عباس علمدار دی بہادری دا بیان ݙیکھو:

تیغ دریغ نہ تھیوے گھدے یکسر ناری ویڑے

آب فرات دا زہر ہلا ہل جاں نہ آوݨ نیڑے

آکھے عمرا ݙسو بھیڑے کیا پھیر پیوہے بھیڑے

آکھن رن وچ آن پیا کوئی شیر ہے شیر ہے شیر ے

دید تلے جو آندا جاندا تھی ڈھاندا دو تک ہے

آکھن شامی ہے ہے ہے ہے تیغ نہیں ایہہ چک ہے

آکھے عمرا مارݨ والا ہکو ہے یا لکھ ہے

آکھن شامی قسم خدا دی ہک ہے ہک ہے ہک ہے

حوالہ

کتاب: سرائیکی شاعری دا اِرتقاء، مصنف: ڈاکٹر نصراللہ خان ناصر، چھاپہ خانہ : جھوک پبلشرز ملتان