مولوی اللہ بخش جانباز

مولوی اللہ بخش جانباز دے والد مولوی قربان علی قندھار توں نقل مکانی کر تے تحصیل علی پور وچ آن وسیئے۔ مولوی اللہ بخش جانباز دے والد شاہ شجاع دے وزیر ہن۔ مولوی اللہ بخش دے والد بعد وچ وستی ملک ارائیں وچ دینی درس ݙیندے ہن۔ سئیں جانباز دا ڄمݨاں1840ء وچ تھیا۔ آپ حضرت خواجہ فخر جہاں سئیں دے مرید ہن۔ آپ کوں حضرت خواجہ فرید سئیں دی کچاریاں وچ ٻہݨ دا وی شرف حاصل تھیا۔ ٻہوں وݙے قادر الکلام شاعر ہن۔ فی البدیہ شاعری وچ کمال حاصل ہانیں۔ حضرت خواجہ فرید اکثر آپ کوں فرمائش کر تے فی البدیہ شعر سُݨدے ہن۔ انھاں شاہنامہ فردوسی دی مشہور عشقیہ داستان بیزن منیژہ کوں سرائیکی وچ منظوم کیتا۔(99)ایں توں علاوہ قصہ جانباز عالم تصنیف کیتا۔ ایں قصے وچ انھاں اپݨی محبت دی داستان رقم کیتی۔ شروع وچ تخلص اللہ بخش کریندے ہن۔ بعد وچ جانباز آکھیونیں۔ ٹھل حمزہ تحصیل لیاقت پور دے شاعر مولوی اللہ ݙتہ نال اکثر شاعرانہ چشمک رہندی ہئی۔

ݙوہڑہ

رُتیں مڑیاں رانجھݨ سائیں مینہ ساوݨ دے آئے

کِلکاں کانہہ تھئے ول ساوے طول تلّے سر چائے

مانجھی سارے جھوک لݙا کر ٻیٹ اساݙڑے آئے

دل جانباز کوں تانگھ سدا کیوں رانجھݨ سئیں چِر لائے

حوالہ

کتاب: سرائیکی شاعری دا اِرتقاء، مصنف: ڈاکٹر نصراللہ خان ناصر، چھاپہ خانہ : جھوک پبلشرز ملتان