نور محمد کہتر

سائل نور محمد کہترسرائیکی زبان دا شاعر ہے۔ مولانا نور محمد کہتر ضلع مظفر ڳڑھ دے معروف قصبے سبائے والا دے رہݨ والے ہن۔ آپ سچے عاشق رسول ہن۔ آپ دیاں نعتاں کوں وݙی مقبولیت حاصل تھئی۔ آپ بنیادی طور تے نعت گو شاعر ہن۔ آپ دی پیدائش سبائے والا 1871ء وچ تھئی تے وفات1941ء وچ تھئی۔

نمونہ کلام

کیا مٹھا ہے نام احمد ہر دل دے من بھان٘وݨ والا

مجرماں بدکاراں دا رہبر تے غم کھاوݨ والا

ٻے کہیں مُرسل  کوں ایہ عہدہ  نہ ملیا  عرش دا

ٻیا خطاب ‌‍‌"اُدنِ مِنی" حق دے فرماوݨ والا

یاد کیتا رب تیکوں اَڄ لامکاں دی سیر کر

ݙے کے بوسے قدماں تے جبریل  چڳواوݨ والا

حکم تھیا ملکاں کوں سب سجدہ کرو تعظیم والا

فرش توں محبوب میݙا عرش تے آوݨ والا

واپس ڄݙاں آیا سڄݨ، ہا عرش رو کے آکھدا

وَل ݙیکھاں ولسی کݙاں ہر دل دے برماوݨ والا

نیک ہن منظور رب کوں، کون ہے بدکاراں دا

بے کساں کوں آپ خود احمد‍‌ؐ ہے ڳل لاوݨ والا

بشر کیا حیواناں دا،  رہبر سدا ہئی مصطفیٰؐ

بݨ ضامن ہرنی کوں سائیں آپ چھڑواوݨ والا

کیا صفت کہتر کرے، طاقت بشر کوں کجھ نہیں

خود خدا جیندا ثناء خواں شان ڄݨواوݨ والا

۔

حوالہ

کتاب: سرائیکی شاعری دا اِرتقاء، مصنف: ڈاکٹر نصراللہ خان ناصر، چھاپہ خانہ : جھوک پبلشرز ملتان