مولانا محمد عمر اچھرویؒ

مولانا محمد عمر اچھرویؒ "مناظر اعظم" دے لقب نال مشہور ہن۔

نام و نسب:

انہیں دا اصل ناں محمد عمر ہئی تے انہیں دا لقب "مناظرِ اسلام" ہئی۔ انہیں دا سلسلہ نسب ایں طرح ہے: محمد عمر بن محمد امین بن عبد المالک قریشی۔ انہیں دا تعلق غلام محی الدین قصوری دے خاندان نال ہئی جنہیں دا سلسلہ نسب سیدنا صدیق اکبرؓ تائیں ویندے۔

ڄمݨ دی جاہ:

محمد عمر اچھرویؒ 1901ء وچ قصبہ "شیروکانہ"، ضلع قصور، پنجاب (پاکستان) وچ پیدا تھئے۔

تعلیم:

اوں نے ابتدائی تعلیم اپݨے والد مولانا محمد امین توں حاصل کیتی۔ دینی علوم مولانا صلاح الدین، مولوی محمد حسین لکھوی، مولوی عطاء اللہ لکھوی تے مولوی محمد عالم سنبھلی (لاہور) توں پڑھیے۔ امام اہلسنت امام احمد رضا قادریؒ دے شاگرد مولانا محمد حسین (امام و خطیب پلٹن فیروز پور) دے کول وی کجھ عرصہ زیر تعلیم رہے۔ اوں نے مدرسہ رحیمیہ دہلی وچ درس حدیث دی تعلیم حاصل کیتی تے مولوی عبداللہ روپڑی (اہل حدیث) توں سند حاصل کیتی۔ مولانا احمد علی سہارنپوریؒ تلمیذ رشید مولانا احمد علی میٹھی توں دوبارہ حدیث شریف دا درس گھدا۔ اوں نے مختلف مسالک دے مدرسیاں توں تعلیم حاصل کیتی تاکہ انہیں لوکیں وچ رہ تے انہیں دی حقیقت معلوم کر سڳن، اِیں وجہ توں اوہ اہلسنت دے کامیاب مناظر بݨے۔

القابات و خطابات:

عمر اچھرویؒ کوں جامع المنقول والمعقول، استاذالعلماء، قاطعِ مرزائیت ونجدیت ووہابیت، حامیِ قرآن و سنت تے مناظرِ اعظم دے القاب ݙتے ڳئے۔

بیعت و خلافت:

عمر اچھرویؒ شیرِ ربانی شیر محمد شرقپوریؒ دے مرید ہَن تے سید محمد اسماعیل شاہ المعروف "حضرت کرمانوالہ" دے فیض یافتہ ہَن۔

مناظر اعظم:

محمد عمر اچھرویؒ دی وجہ شہرت علما و عوام وچ مناظرہ ہئی۔ قیام پاکستان توں پہلے 1940ء وچ انہیں دی شہرت پورے برصغیر وچ پھیل ڳئی ہئی۔ اللہ تعالیٰ نے انہیں کوں تمام علوم وچ بالعموم تے "علم المناظرہ" وچ بالخصوص وݙا حصہ عطا فرمایا ہئی۔ مناظرے وچ انہیں کوں ایݙا کمال حاصل ہئی کہ مخالفین دے وݙے وݙے مناظر مقابلے وچ آوݨ توں گھباندے ہَن، اگر کوئی آ وی ویندا تاں یاتاں بھڄ ونڄݨ تے مجبور تھی ویندا یا ول شکست کھاندا ہا۔ اوں نے تقریباً 50 کامیاب مناظرے کیتے جیندے وچ اوہ ہمیشہ فاتح رہے تے شکست مخالفین دا مقدر رہی۔ انہیں دی ہک خاص ڳالھ ایہ وی ہئی کہ پورے برصغیر (پاک و ہند) وچ انہیں کوں جݙاں وی مناظرے کیتے سݙیا ویندا ہئی، اوہ ہمیشہ تیار رہندے ہَن۔

خدمات:

اوں نے مسلک اہل سنت و جماعت دے تحفظ کیتے تحریری تے تقریری کوششاں وچ اپݨی پوری زندگی لا ݙتی۔ اوہ ایݙی شخصیت دے مالک ہَن جنہیں کوں بلا تخصیص تمام باطل مذاہب دے مقابلے وچ پیش کیتا ونڄ سڳدا ہئی۔ علم دی وسعت تے حاضر جوابی وچ انہیں دی مثال پیش نئیں کیتی ونڄ سڳدی، تقویٰ تے پرہیزگاری وچ وی اوہ اپݨی مثال آپ ہَن۔ تقریر دے دوران اوہ قرآن پاک دیاں آیات توں اِتنے استدلال کریندے ہَن کہ عقل حیران رہ ویندی ہئی۔ ہر روز قرآن مجید دے پنج سپارے دی تلاوت تے شب بیداری انہاں دے معمولات وچ شامل ہئی۔ اوں نے تحریک پاکستان تے تحریک ختم نبوت وچ وی بھرپور کردار ادا کیتا۔

تصنیفات:

انہیں دیاں کجھ تصنیفات اے ہِن:

• مقیاس حنفیت
• مقیاس نبوت
• مقیاس مناظرہ
• مقیاس نور
• مقیاس خلافت
• مقیاس صلوٰۃ
• مقیاس وہابیت

وفات:

مولانا عمر اچھرویؒ 2 ذیقعدہ 1391ھ بمطابق 21 دسمبر 1971ء بروز منگل وفات پا ڳئے۔ مفتی اعظم پاکستان علامہ ابو البرکات سید احمدؒ نے نماز جنازہ پڑھائی۔