مولانا عبدالمالک صادقی

مولانا عبدالمالک گجرات دے رہݨ والے ہن۔ ملازمت دے سلسلے وچ بہاول پور وچ آباد تھی ڳئے۔ آپ عربی ‘ فارسی دے عالم فاضل ہن۔ آپ مولانا نصیر الدین خرم دے ہمعصر ہن۔ مولانا صادقی کوں خرم بہاول پوری دے کلام تے اعتراض ہئی۔ ایں طرح صادقی تے مولانا خرم دی آپس وچ لاڳ بازی تھی ڳئی۔ جوابی سوالی نظماں تے کافیاں لکھیاں ڳیاں۔ ہک ٻئے دے کلام تے اعتراض کیتے ڳے۔(23)ادبی بحثاں بہاول پور دے جرائد وچ شائع تھیوݨ لڳیاں۔ ایں شاعرانہ چشمک دے نتیجے وچ وݙا معیاری کلام سامݨے آیا۔ خرم بہاول پوری اوں زمانے وچ اپݨی مشہور کافی ’’کٹھے پے ہیں یار دے نازاں دے‘‘ آکھی تاں مولانا صادقی اوندے مقابلے وچ ہوں زمین وچ ہک کافی آکھی۔ نمونہ ملاخطہ فرمائو:

کافی

جݙاں لدھم یار دے رازاں کوں

ٻہوں پڑھداں نفل نمازاں کوں

ایہا مستی دی ہشیاری ہے

ݙینہ رات ایہو کم جاری ہے

جیں صوم صلوٰۃ وِساری ہے

ککھ ݙے ڳیا او ݙٹ بازاں کوں

جنھاں فکر کیتا انجام دے وچ

اتے گذری عمر صیام دے وچ

سُڄ سُڄ ڳے پیر قیام دے وچ

انھاں سمجھیا ڳجڑے رازاں کوں

ڳئی دنیا ہتھوں خالی جا

پر دین دی مُوڑی توں نہ ونڄا

کجھ سمل کوں گھن بھرا

سٹ غفلت دے اندازاں کوں

حوالہ

کتاب: سرائیکی شاعری دا اِرتقاء، مصنف: ڈاکٹر نصراللہ خان ناصر، چھاپہ خانہ : جھوک پبلشرز ملتان