مولانا عبدالغفور مفتون ہمایونی
پ1261ھ؍1844ء، وفات 11رمضان1236ھ؍1918ء
مولانا عبدالغفور مفتون ہمایونی دھاری ہمایوں وچ پیدا تھئے ۔ منڈھلی تعلیم والد صاحب ݙتی۔ انھاں دی وفات پچھوں مولوی سلطان سیت پوری ہوراں باقی تعلیم پوری کرائی۔ اپݨے والد ہوراں دی گدی تے ٻیٹھے درس و تدریس اتے پیری مریدی دا سلسلہ شروع کتونے۔ درس و تدریس دے علاوہ لوکاں کوں طبی تعلیم وی ݙیندے ہن۔ زالیں مرد دوا داروں اتے دعا شرعی فتوے گھنن آپ کول آندے ہن۔ وݙے عبادت گزار صوم و صلوٰۃ تے تہجد دے پابند ہن۔ کھاوݨ پیوݨ معمولی ہانے ‘ سدھی سادھی گزران ہانے۔ رجھاں دے باوجود وقت کڈھ تے شعر و شاعری وی کر گھندے ہن۔ سیاست کنوں اصلوں پرے ہن۔ انھاندی پرہیزگاری دا ایہ عالم ہا جو مسلماناں دے علاوہ ہندو ‘ عیسائی ‘ پارسی ‘ چھوٹے وݙے سبھے انھاندے عقیدت مند ہن۔ پنجھتر سال دی عمر وچ فوت تھئے اتے اپݨے والد دی قبر دے نال دفن تھئے۔(78)
میں تاں بردی آں یار پیارے دی
اُہیں دوست مٹھل من ٹھارے دی
در تیݙے دا بھرساں پاݨی
سک گھنڑیں ہے ساکوں سٻاݨے دی
توں محب مٹھل من ٹھارے دی
اصل کنوں ہاں تیں لئی براگی
کجھ تاں مٹھی ہاں آہیاں ساگی
ݙینہاں رات مشتاق نیارے دی
عشق اساݙے سر تے جھلیا
وچ ڳلیاں دے وڄ کر ہُلیا
کئی لڳڑی چوٹ نغارے دی
رت چھڈیندیاں آنون اکھیاں
خون عاشق دی خاطر بکھیاں
میں گھول اونہیں خونخوارے دی
مژگاں تیݙیاں موت مریندیاں
رمزاں رسیل واٹ پھریندیاں
ساکوں کل نہیں انھیں چارے دی
مفتون آکھے ملک تساݙی
جان جثہ تے جندڑی ساڈی
تیکوں پارت ہے بے چارے دی
حوالہ
[لکھو | ماخذ وچ تبدیلی کرو]کتاب: سرائیکی شاعری دا اِرتقاء، مصنف: ڈاکٹر نصراللہ خان ناصر، چھاپہ خانہ : جھوک پبلشرز ملتان