موسیٰ ٹھٹھار

اسیݙی وستی دے بزرگ موسیٰ ٹھٹھار دے قصے ݙاڈھے سُݨیندے ہَن ۔ ریاست بہاولپور دے ہک سوہݨے شہر خانپور وچ ہک محلہ ٹھٹھاراں  ہے، ایں  محلے اچ وݙے محنتی تے کاریگر ٹھٹھار رہندے ہن ، اے لوک کُٹ دے کٹورے بݨیندے ہن، انہاں  دے بݨیے ہوئے کٹورے دلی تے ولائت تک مشہور ہن، انہاں  دی وجہ توں  خانپور دا ناں  خانپور کٹورہ مشہور تھیا ۔ محلہ ٹھٹھاراں  دے ٹھٹھاریں  دا کاروبار ݙاڈھاچکمیا ہا ، پیسہ پا ڈھیر ہوندا ہا، لوک اپݨی روایت دے پکے، بھلے مانس تے سادمرادے ہن، پا پیسے والے لوک چادر ، چِٹا چولا تے کئی گز دی اُچی پڳ پیندے ہن۔ انگریز دور ہا ، خانپور ( جیڑھا پہلے ضلع ہا ) دا وݙا افسر پڳ والے لوکیں  نال مزاخاں  کریندا ہا تے کہیں  ویلھے پڳ کوں  ہنٹر نال چھیڑݨ دی کوشش کریندا ہا، ہک ݙینھ انگریز افسر اپݨی گھوڑی تے ہوا خوری تے ویندا پیا ہا، چوک اچ اُچے قد، سوہݨی شکل تے اپثی پڳ والا بندہ نظر آیا تاں  اپݨے تَلہڑنال پڳ کوں  تلے لہا ماریا ، پڳدار ہک کیتی نہ ٻئی انگریز افسر دے منھ بھن ݙتا۔ کیس اُتے تئیں  ڳیا پر کجھ نہ بݨیا ، اوں  عزت مند سرائیکی پڳدار دا ناں  ہا موسیٰ ٹھٹھار ۔ اڄ قوم کوں  موسیٰ ٹھٹھار جہے غیر مند پُتریں  دی ضرورت اے ۔

حوالہ

کتاب: مُہاڳ، مصنف: ظہور احمد دھریجہ ، ناشر: جھوک پبلشرز ، ملتان