موسماں دے گیت

انسان دا موسماں نال ہمیشہ ٻہوں گھاٹا رشتہ ریہے۔ موسم اساݙے سنگتی ہن جیڑھے ون ون دیاں سوغاتاں چا تے اساݙی حیاتی وچ آندن ۔ سرائیکی علاقے وچ گرمی ٻہوں پوندی ہے ایندے علاوہ اِتھاں پاݨی دا وی ٻہوں کال ہے ۔ ساون دے مہینے وچ مینہ رَڄ رَڄ تے وسدے تاں دھرتی دی گرمی ‘ تریہہ لہہ ویندی ہے ۔ ݙوجھا انب ‘ پنڈ اِتھوں دے مشہور میوے ہن۔ جیڑھے امیر غریب ݙوہاں دے ملک ہن۔ ہِیں کیتے ایں علاقے وچ ساوݨ دے موسم کوں وݙی سِک نال یاد کیتا ویندے۔ ساوݨ موسم دے کئی لوک گیت سرائیکی زبان وچ ملدن۔

گرمی دے موسم وچ پکھا نہ صرف ٹھڈیاں ہیلاں ݙیندے بلکہ اے اساݙے وسیب دی ہک ثقافتی علامت وی ہے۔

پکھے دا گیت

جھلاں پکھا تے آوے ٹھڈی وا تے موسم گرمی دا

جھلاں پکھا تے نندر ونڄے آ تے موسم گرمی دا

پنج روپے ڈیندی آں تے درزی کوں سݙویندی آں

میݙے پکھے کوں ݙیوے جھالر لا تے موسم گرمی دا

پنج روپے ݙیندی آں تے لوہار کوں سݙویندی آں

میݙے پکھے کوں ݙیوے ݙنی لا تے موسم گرمی دا   (53) 

باقی مصرعیاں وچ اینویں درکھاݨ ‘ سنار دے ناں شامل کر تے ٻول دھرائے ویندن۔

حوالہ

کتاب: سرائیکی شاعری دا اِرتقاء، مصنف: ڈاکٹر نصراللہ خان ناصر، چھاپہ خانہ : جھوک پبلشرز ملتان