منیزہ بختاری

منیزہ بختاری (فارسی: منیژه باختری) ہک افغان سفارت کار، مصنفہ تے صحافی ہِن۔ اوہ آسٹریا وِچ افغان سفیر دی حیثیت نال خدمات انجام ݙیندی رہیاں ہِن۔ نورڈک مُلکاں (ناروے، سویڈن، ڈنمارک، آئس لینڈ تے فن لینڈ) وِچ اوہ سابقہ افغان سفیر ہَن۔ منیزہ بختاری اِیں توں پہلے افغان وزارت خارجہ دی چیف آف اسٹاف تے کابل یونیورسٹی وِچ جزوقتی لیکچرار دی حیثیت نال وی خدمات انجام ݙے چُکیاں ہِن۔

زندگی تے تعلیم

منیزہ بختاری افغان شاعر واصف بختاری دی دِھی ہِن۔ منیزہ بختاری نے صحافت وِچ بی اے کِیتا ہِے تے کابل یونیورسٹی توں فارسی زبان تے ادب وِچ ایم اے کِیتا ہِے۔ 2002ء وِچ اوہ کابل یونیورسٹی دے شعبہ صحافت وِچ معلمہ دی حیثیت نال تعینات تھئیاں۔ آپݨے سفارتی عہدیاں توں پہلے منیزہ بختاری نے ہک غیر سرکاری تنظیم، تعاون سنٹر برائے افغانستان دے نال کم کِیتا۔

تصانیف

اوہ صحافت دی ݙو کتاباں دی مصنف ہِن (کابل یونیورسٹی دے شعبہ صحافت وِچ اِیہ نصابی کتاباں ہِن):

• دلچسپ دُنیا دی خبراں تے اخلاقیات
• صحافت وِچ قانون

اوہ انگبین نیش کھنڈ و شرنگ نوش کھنڈ (Angabin Neshkhand wa Sharang Noshkhand) دی مصنف ہِن، جیڑھی افغانستان وِچ طنزیہ صنف دی جدید تاریخ دے بارے وِچ ہک کتاب ہِے۔ اُنّھاں نے تھری اینجلس دے عنوان نال کہانیاں دا ہک مجموعہ شائع کِیتا ہِے جیندے وِچ افغان زنانیاں دے مسائل کوں اجاگر کِیتا ڳیا ہِے۔ اوہ پارنین میگزین (ہک ثقافتی تے ادب سہ ماہی میگزین) دی چیف ایڈیٹر ہَن۔

ذاتی زندگی

منیزہ بختاری نے ناصر ہوتکی نال شادی کیتی جیڑھے ہک افغان کاروباری شخصیت تے کھیݙاں دے اعلیٰ منتظم ہِن۔ منیزہ دے چار ڄَاچے ہِن جِنّھاں دے ناں مریم ہوتکی، مصطفیٰ ہوتکی، نوشین ہوتکی تے پارنین ہوتکی ہِن۔