منظوم ادب

سرائیکی زبان دے منظوم ادب تے نظر پھیروں تاں ہک بحر بیکراں ہے ۔ ذہنی شاعری دے حوالے نال ݙیکھوں تاں حمد ، نعت ، مولود تے مرثیہ دا اتنا وݙا ذخیرہ موجود ہے جیندا مقابلہ دنیا دی کوئی ٻئی زبان نی کر سڳدی ۔ صوفیانہ شاعری دی حمد ، نعت ، ابیات تے کافی دی شکل اِچ ہزاراںصفحات تے کھنڈی پئی ہے ۔ سرائیکی شاعری اِچ غزل تے نظم جدید دور دے سرائیکی ادب دی نمائندگی کریندی ہے ۔ سرائیکی منظوم لوک داستانیں دے حوالے نال سرائیکی ادب اِچ گراں قدر سرمایہ موجود ہے ۔ انہاں اِچ ہیر رانجھا ، سسی پُنوں ، مرزا صاحباں ، سوہݨی مہینوال ، سیف الملوک ، سمی ، لیلی مجنوں، یوسف زلیخا شامل ہن ۔ سرائیکی لوک گیتاں تے نظر پھیروں تاں ہک ٻہوں وݙا ذخیرہ ہے ۔ انہاں اِچ شادی پرنے دے سرائیکی لوک گیت ، ٻالیں دے گیت ، کھیݙیں دے گیت تے فصلیں دے گیت شامل ہن ۔ ݙوہڑہ ، قطعہ ، ہائیکو تے سرائیکو دا بیش بہا خزانہ وی موجود ہے۔

سرائیکی زبان دا نثری ادب دی ہک گراں قدر خزانے دی شکل اِچ موجود ہے ۔ ایندے اِچ لوک کہانیاں افسانہ، ڈرامہ ، ناول ، انشائیہ ، خاکہ ، لسانیات ، فریدیات ، تحقیق، تنقید ، تاریخ،ثقافت ، لوک ادب ، سیاسیات تے صحافت شامل ہن ۔ انہاں تمام اصناف توں ودھ کے سرائیکی دینی ادب اِچ بیش بہا خزانہ موجود ہے۔

حوالہ

کتاب: میݙی دھرتی، میݙے لوک ، مصنف: ظہور احمد دھریجہ ، ناشر: جھوک پبلشرز ، ملتان 2018ء