منظور سوختہؔ

1954ء تا  2012ء

بزمِ سوختہ ،دے بانی منظور حسین سوختہ (مرحوم) دا تعلق ضلع خانیوال دی تحصیل کبیر والا نال ہا ۔ آپ سرائیکی زبان دے چنھاوڑ لہجے دے ہک عمدہ شاعر ہن۔ 1975ء کنوں انہاں شاعری دا آغاز کیتا تے بہوں جلدی اوہ سینئر شعراء دی صف اچ شامل تھی گئے۔تے سرائیکی شاعری دیاں تقریباََ ساریاں صنفاں وچ طبع آزمائی کیتی ۔منظور سوختہ دی شاعری اچوں راوی تے چنھاں دی مٹی دی خوشبوآندی ہے۔2004ء اچ ’’بکھ دی دار‘‘ دے عنوان نال انہان دی ہک کتاب وی چھپ چکی ہے ۔منظور سوختہ مرحوم اجاں بہوں کجھ لکھناں ہا جو مارچ2012ء وچ اوہ اللہ کوں پیارے تھی گئے۔ آپدا نمونہ کلام حاضرِ خدمت ہے۔

(1)غزل

افکار درس گاہ ہن، زندگی کتاب ہے

آساں دے کورے کاغذ پھولن عذاب ہے

رنداں دا شور غُل ہے ، زاہد دی جستجو

گھونگھٹ دے میکدے وچ اکھ دی شراب ہے

مستی دے وچ وی آون دل دا فتور ہے

نظراں توں جے پِیویوے تاں امرت شراب ہے

گل پا ہجر دی مالا یاداں دی خانقاہ تے

ہنجواں دا کرتے وضو جاگن ثواب ہے

کل سوختہؔ حضور!اوقات بھل گیا ہا

نوکر تے کیہاں نخرہ حاضر جناب ہے