منظور بھُٹہ

اصل ناں       منظور حسین

قلمی ناں        منظور ؔبھٹہ

جٖمنْ            1956ء

تعلیم            میٹرک پی۔ٹی ۔سی

پیشہ            ریٹائر مدرس

فون نمبر         0306 8769020

 جاہ پتہ          وستی شاہ نواز تحصیل و ضلع لیہ

منظور بھُٹہ دا شمار ضلع لیہ دے سینئر شعراء وچ تھیندے ۔آپ شاعری دے نال نال نثر وی لکھدن۔ سرائیکی شاعری دیاں تمام مروجہ اصناف تے طبع آزمائی کر چکے ہن ۔ ’’میڈٖی کمت‘‘ تے ’’منزل بدلو‘‘ آپدیاں منظوم کتاباں ہن۔تے ایویں ’’معزز کون‘‘ آپ دی نثری کتاب ہے۔جڈٖاں جو مضامین ایں کنوں علاوہ ہن۔جتھوں تک آپ دی غزل دا تعلق ہے تاں خوبصورت غزل لکھدن۔۔نمونہ کلام پیشِ خدمت ہے۔

(1)غزل

ڈٖکھ تے غم ہمراز بنْیئے ہن ، خوشیاں آونْ چھوڑ ڈٖتا ہے

اکھیں صبر دیاں عادی تھی گٖئین نیر وہاونْ چھوڑ ڈٖتا ہے

انساناں دے ڈٖیکھ رویئے کندھاں کوں ہمراز بنْا ئے سے

کندھاں وی نئیں راز لکایا انت الاونْ چھوڑ ڈٖتا ہے

فصل کُما گٖئی تِڈٖے بھوکن ، پکھی راگٖ فراق دے گٖاون

ایویں لگٖدے ادھوانْے وچ ساکوں ساونْ چھوڑ ڈٖتا ہے

سر کجٖے تاں تن ننگا ہے ، تن کجٖے تاں سر ننگا ہے

حوّا جٖائی آخر سر تے بوچھنْ پاونْ چھوڑ ڈٖتا ہے

جئیں ڈٖینہ کولوں ہتھاں دیوچ آگٖئین یار کلاشنکوفاں

اوں ڈٖینہ کولوں طالب علماں بستے چاونْ چھوڑ ڈٖتا ہے

جے کہیں کوں میں حال سُنْینداں مار ٹھکارے او کھلدا ہے

ہُنْ بھٹہؔ احساس تھیا ہے حال سناونْ چھوڑ ڈٖتا ہے