منشی نور محمد گدائی

منشی نور محمد گدائی شعر و ادب دی دنیا اِچ گدائی دے ناں نال مشہور ہن۔ آپ تحصیل لیاقت پور دے مردم خیز علاقے دے وسوں واݨ ہن۔ بعد اِچ آپ ملتان شریف آ وسیئے ۔سئیں نورن گدائی ہک ہمہ گیر شخصیت دے مالک ہن۔ مرثیہ گوئی دے علاوہ قصے ‘ ناٹک ‘ گیت تے ݙوجھا کافی کلام یادگار چھوڑئیے۔ آپ دیاں مرثیے دیاں وی ڈھڳ ساریاں کتاباں شائع تھی چکن۔کلام اِچ شعریت تے روانی ہے ۔ نورن گدائی دیاں کجھ کتاباں مرثیے بارے اے ہن۔ اظہارِ شیدائی ‘ اعجاز کربلائی حصہ اول و دوم ‘ انوارِ کبریائی ‘ بیاض شہدائی ‘ داستان غم ‘ دربار کربلائی ‘ ذوالفقار شہدائی ‘ روضہ رضوان ‘ غوغاء کربلائی‘ گلزار شہدائی ‘ گلزار کربلائی ۔ سئیں نورݨ گدائی دے دفعہ فقیر والے کوں وݙی شہرت حاصل تھئی ۔ ایں دفعہ دے 49شعراں وچ حضرت امام حسینؑ دی سخاوت تے میدانِ کربلا وچ ہک اجنبی فقیر درویش نال ڳالھ مہاڑ بیان کیتی ڳئی اے۔ نورݨ گدائی دے ایں دفعہ دا آغاز حمدیہ اشعار توں تھیندے تے ول کربلا دا دردناک منظر پیش کیتا ڳے۔

سُݨ کر عرض فقیر نے ول کر ایہا ݙس مسافر

یا کہیں شہر دا ہیں سوداگر یا ہیں سید صابر

شاہ فرمایا بندہ ربّ دا قصہ ݙکھاں دا بھارا

سُݨ نہ سنگسیں حال میݙا ہاں تھیا پارا پارا

اے میں غریب دے مارݨ کیتے کھڑا ہے عالم سارا

ݙیکھ گھنیں اویں لحظے تائیں جو ہووݨا ہے یارا

پیا جو توں پچھدا ہیں میݙا میکوں ڄاݨے کل زمانہ

نام جیندے دا کلمہ پڑھدیں میں حسین دا نانا

بابل میݙا شاہ مردانہ اَمڑی مالک ݙوں جہاناں

اَڄ میں غریب دے مارݨ کیتے کھڑے چا تیر کماناں

حوالہ

کتاب: سرائیکی شاعری دا اِرتقاء، مصنف: ڈاکٹر نصراللہ خان ناصر، چھاپہ خانہ : جھوک پبلشرز ملتان