منشی محمد رمضان بہار ملتانی
بہار ملتانی ‘ مولوی گل محمد عاشق ملتانی دے شاگرد ہن ۔ تنویر الابصار بحرمعافی ‘ حسینی زوار ‘ ساغر معافی ‘ شمس الانوار ‘ صحیفہ انوار ‘ ہاشمی دربار ‘ گلدستہ اشعار ‘ مجالس چہاردہ ‘ گلزار حیدری وغیرہ دے خالق منشی محمد رمضان بہار ملتانی دا رنگ ٻہوں دل چھکواں تے پُر سوز ہے ۔ آپ دا کلام ہر طرح تے فنی معیار تے پورا اتردے ۔کلام وچ انسانی جذبیاں دی حقیقی عکاسی ݙسدی ہے۔
چا کر لاشے ٻالاں دے شاہ گنج شہداء وچ آیا
سݨ فریاد خدایا
پاک ہمشیر دی جوڑی کوں اَڄ خاک تے آن لٹایا
سُݨ فریاد خدایا
نیر وہاوے کمر جھکاوے سئیݨ بتول دا ڄایا
سُݨ فریاد خدایا
جوڑ کے لاشے ٻالاں دے ول بھیݨ کوں آ پرچایا
سُݨ فریاد خدایا
ݙیکھ کے حالت شاہ بیکس دی بیبیاں پٹڑاں لایا
سُݨ فریاد خدایا
رو فرمایا زینبؑ خاتوں درداں مار مُکایا
سُݨ فریاد خدایا
بہار حسین دے در اقدس توں عالی رتبہ پایا
سُݨ فریاد خدایا
حوالہ
[لکھو | ماخذ وچ تبدیلی کرو]کتاب: سرائیکی شاعری دا اِرتقاء، مصنف: ڈاکٹر نصراللہ خان ناصر، چھاپہ خانہ : جھوک پبلشرز ملتان