منشی برات علی (سسی پنوں)

1365ھ۔1937ء

سسی پنوں دا واقعہ عشق دی ہک ایجھی انوکھڑی داستان ہے جئیں وچ وین کریندی سسی ‘ اپݨے پنوں دے پیرے چاتی تھل مارو دے پینڈے کچھیندی ݙسدی ہے ۔ ہک رات دی پرنی سسی دے وِچھوڑے کوں سرائیکی زبان دے شاعراں عشقیہ شاعری دا سب توں زیادہ موضوع بݨائے۔

منشی برات علی دی سسی دا ہک بند ملاحظہ کرو۔

عشق ازار پوڄایا چشماں تارو ہن ݙو ندیاں

میں منتاری تانگھ ٻہوں سر بار ہجر دیاں بدیاں

دلبر پھیر نہ پھیرا کیتا گزر ڳئیاں سئے صدیاں

آس اُمید براتا دل وچ یار ڳولیندی ودی آں

درد رسیدہ لوکیں کوں فرقتاں رات ݙینہاں ستیندیاں رہندن۔ سکھ چین برباد تھی ویندن تے غم کٹھ کرکے ݙکھیئے دل دے مہمان تھی ویندن۔

منشی برات علی دا سسی وچوں ہک ݙوہڑہ:

شوق مقدم کرکے لایم کان سکھاندے نیڑا

عشق امن برباد تھیا ݙینہ رات غماں دا بھیڑا

فرقت سخت ستایا آیا وات ݙکھاندے جیڑا

عشق دے درد رسیدہ کوں کیا ݙیسی موت نپیڑا

حوالہ

کتاب: سرائیکی شاعری دا اِرتقاء، مصنف: ڈاکٹر نصراللہ خان ناصر، چھاپہ خانہ : جھوک پبلشرز ملتان