ممنون بخاری . ڄاݨ سنڄاݨ
ج: 1950ء
ممنون بخاری دا پورا ناں سید فیاض حسین بخاری اے۔ انہاں دے ابا سئیں دا ناں منظور حسین بخاری اے ۔ انہاں دی تعلیم بی اے ہے۔ انہاں دا ڄمݨاں 1950ء دا ہے اُرود وی لکھدن سرائیکی اچ وی شاعری کریندن۔ حالی تئیں انہاں دی کتاب چھپ نی سڳی۔ سرائیکی سنگت نال بہوں پراݨا تعلق رکھیندن۔ غزل وی ݙاݙھی سوہݨی لکھدن پر مصیبت ئِ جو ٻہوں تھوڑا لکھدن ۔ میݙے ہتھ اُنھاں دیاں ݙوں چار غزلاں آئن ۔ میںجنھاں کوں ریکارڈ دا حصہ بݨا گھدے ۔
؎ پرلی بِھک دے چھڑتل ڈھانڈے راکھی کھادی ویندن
ایں منہ زور زناوریں دا سبھ لشکر مار ݙیویجے
سچ دی بازی جیتݨ دا گُر ہک شہزادہ ݙس گئے
ظالم جیجھا تخت تے ہووے ٹکر مار ݙیویجے
٭ بمطابق شناختی کارڈ، ملاقات دیرہ نواب صاحب۔3مارچ 2012ء
کلام ٭
(1)
ݙے تے دردیں وات کوئی ایجھا پسیلا تھی ڳیا
آس دے گلشن دا ساوا رنگ پیلا تھی ڳیا
بے سوب رُس جو ڳیا میں توں میݙے سکھ دا سوب
میݙے گھر آباد دردیں دا قبیلہ تھی ڳیا
وا جھلوڑے بݨ ڳے طوفان ایجھا کیا ݙساں
آلھڑاں ککھاں دا میݙا تیلا تیلا تھی ڳیا
عید دے ݙینھ شیت میکوں بھُل تے بھاکل پا کھڑا
میں جو اَکھ چا تے ݙٹھم او کالا نیلا تھی ڳیا
میݙی بیہوشی کوں لوکیں موت ڄاتا شکر ہے
اوندے ٹُر آوݨ دا ممنوناں وسیلہ تھی ڳیا
(2)
میݙے خواباں کوں وی رنگین بݨاوݨ آوے
توݨے ہک زخم نواں دل دا ودھاوݨ آوے
ول نہ پچھساں میں کوئی ڳالھ وی اُوندے کولوں
لنگھ تاں آوے توݨے کجھ وی نہ ݙساوݨ آوے
میںوی ہک وار رُساں اُوندے کنوں ہوں وانگوں
میکوں ہک وار میݙے وانگ مناوݨ آوے
ایں محلے دے کئی لوک اُوندے جاݨوں ہن
توݨے کہیں نال تاں اُو حال ونڈاوݨ آوے
ایݙے گھاٹے میݙے زخماں دے غلاب ہن لوکو
آوے پر میݙے کیتے نِجھ کوں نہ ساوݨ آوے
توں اندھاریاں کوں ڳولیندیں تے اندھارے تیکوں
کون ممنونؔ بھلا رستہ ݙساوݨ آوے
(3)
شیشے والے گھر تے ہُݨ تاں پتھر مار ݙیویجے
بے سیتی دے مُندرے لیکھ تے جندر مار ݙیویجے
دشمن دا منہ سیوݨ کیتے پھُل دھاگیں کوں چھوڑوں
رتول دی خیرات کݙ ھیجے منتر مار ݙیویجے
پرلی بھِک تے چھُڑ تل ڈھانڈھے راکھی کھادی ویندن
ایں مونہہ زور زناوریں دا سب لشکر مار ݙیویجے
کیسری بوچھݨ رنگ مہتابی ہوٹھ غلابی موتی ݙند
ڳلھ دے چگھ تے مونہہ رکھ تے بس مُہر مار ݙیویجے
سچ دی بازی جیتݨ دا گُر ہک شہزادہ ݙس ڳے
ظالم جیجھا تخت تے ہووے ٹکر مار ݙیویجے
٭ کلام مصنف دی ذاتی ڈائری اِچوں گھِدا گئے، بمطابق بیاض شاعر
حوالہ
[لکھو | ماخذ وچ تبدیلی کرو]کتاب احمد پور شرقیہ اِچ سرائیکی غزل دی ٹور، مصنف : عبدالباسط بھٹی ، ناشر : جھوک پبلشرز ، ملتان