ممنون بخاری
اصل ناں سید فیاض حسین
قلمی ناں ممنون ؔبخاری
جٖمنْ 1950ء
تعلیم بی اے
جاہ پتہ ڈیرہ نواب ، احمد پور شرقیہ ضلع بہاول پور
ممنونؔ بخاری دا تعلق نواباں دے شہر ڈیرہ نواب ( احمد پور شرقیہ)نال ہے آپ اردو تے سرائیکی ڈٖوہائیں زباناں وچ شاعری کریندن مگر بٖہوں تھوڑا لکھدن ۔نمونہ کلام حاضر ہے۔
(1)غزل
ڈٖے تے دردیں وات کئی ایجھاں پسیلا تھی گٖیا
آس دے گلشن دا ساوا رنگ، پیلا تھی گٖیا
بے سبب رُس جو گٖیا میں توں میڈٖے سکھ دا سبب
میڈٖے گھر آباد دردیں دا قبیلہ تھی گٖیا
واجھلوڑیں بنْ گٖئے طوفان ایجھاں کیا ڈٖساں
آلھڑاں ککھاں دا میڈٖا تیلا تیلا تھی گٖیا
عید دے ڈٖینہ شیت میکوں بھُل تے بھاکل پا کھڑا
میں جو اکھ چا تے ڈٖٹھم او کالا نیلا تھی گٖیا
میڈٖی بیہوشی کوں لوکیں موت جٖاتا شکر ہے
اوندے ٹُر آونْ دا ممنوناںؔ وسیلہ تھی گٖیا
؎ پرلی منْ تے چھُڑتل ڈھانڈے راکھی کھادھی ویندن
اے منہ زور زناوریں دا سبھ لشکر مار ڈٖیوجے