ممتاز بیگم

ممتاز بیگم دی ڄَمَّݨ 5 مئی 1974ء کوں تھئی۔ اوہ ہک بنگلہ دیشی گلوکارہ تے 2014ء توں مانک گنج 2 دے حلقے توں قومی اسمبلی دی رکن ہِن ۔ اُنّھاں کوں "دی میوزک کوئین" دے طور تے ڄاتا ویندے۔ اُنّھاں نے چار دہائیاں تے محیط آپݨے کیریئر وِچ 700 دے نیڑے البمز ریکارڈ کِیتے ہِن۔ ممتاز بیگم بنگلہ دیش، برطانیہ تے امریکا وِچ مختلف محافل موسیقی پیش کر چُکیاں ہِن۔ اُنّھاں نے خاص طور تے لندن وِچ بنگلہ دیشی تارکین وطن دیاں کمیونٹیز کِیتے بے شمار پروگرام سر انجام ݙتے ہِن۔ خاص طور تے اوہ بیساکھی میلے دے دوران آپݨی پرفارمنس کِیتے ٻہوں مشہور ہِن۔ ممتاز بیگم نے فلم پریا تمھیں سکھی ہو (2004) کِیتے بہترین زنانی پلے بیک گلوکارہ دا بنگلہ دیشی قومی فلم ایوارڈ وی جِتیا۔

ابتدائی زندگی

بیگم 5 مئی 1974ء کوں مانک گنج دے سنگیر گاؤں جوائمنٹوپ وِچ ڄَمّیاں ہَن۔ اُنّھاں نے آپݨے بچپن دا وَدھ حصہ موسیقی سِکھݨ وِچ آپݨے والد موڈھو بویاٹی دے نال گُزارا جیڑھے ہک گلوکار وی ہَن۔ اُنّھاں دے ٻئے استاداں وِچ ماتل رزاق دیوان تے عبد الرشید سرکر شامل ہِن۔

کیریئر

شروع وِچ ممتاز بیگم آپݨے جاری کِیتے البمز دی مکمل مالی معاونت خود کریندی ہَن۔ اُنّھاں دی مقبولیت دے بعد پروڈیوسراں نے وَدھ ریکارڈنگ کِیتے پیسے لاوݨ شروع کر ݙِتّے پر اُنّھاں دا معاوضہ ٻہوں گھٹ ہَئی تے معاہدے وِچ اِیں شرط عائد کیتی ڳئی ہَئی جو جے اوہ البم چَنڳّی طرحاں فروخت نی تھیندی تاں اُون٘دی واپسی دی ادائیگی تھیسی۔ تاہم جلدی ئِ اوہ مقبولیت حاصل کر ڳئیاں تے اَکثر ݙین٘ہ وِچ ݙو ݙو گانےآں دی ریکارڈنگ شروع تھی ڳئی۔ بنگلہ دیشی روزنامہ ڈیلی اسٹار دے نال ہک انٹرویو وِچ اُنّھاں نے ݙسایا: "میکوں کجھ منٹ پہلے دھن تے میوزک ٹریک سونپ ݙتا ویندا ہَئی تے اُون٘دی ریہرسل کِیتے شاید ئِ کوئی وقت نی ہوندا ہَئی تے میکوں اُون٘دے کوں ہک ہی وار ریکارڈ کرݨا پوندا ہَئی۔" اُنّھاں دے کجھ میوزک البمز ریٹرن ٹکٹ، اشول بوٹھھوکی، مرسیڈر تلیم تے روج بازار ہِن۔ ممتاز بیگم 2014ء وِچ مانک گنج 2 توں پارلیمنٹ کِیتے وی منتخب تھئیاں ہَن۔

خیراتی کم

ممتاز بیگم نے آپݨے آبائی گاؤں جومونٹوپ وِچ اوربس انٹرنیشنل دے تعاون نال 50 بستریاں دا ممتاز آئی اسپتال قائم کِیتا ہِے۔ اِیہ اسپتال اُنّھاں دے والد موڈھو بویاٹی دی یاد وِچ قائم کِیتا ڳیا ہَئی، جِنّھاں دی بینائی غربت دی وجہ توں موتیے دا آپریشن نہ تھیوݨ دی وجہ توں چلی ڳئی ہَئی۔