ملک عنصر اقبال حیدر

اصل ناں       عنصر اقبال

تخلص          حیدرؔ

جٖمنْ           1978ء

تعلیم          بی یو ایم ایس

پیشہ           آرمی جاب

فون نمبر        0334 3141407

جاہ پتہ         وستی علو والی تحصیل پپلاں ضلع میاں والی

ملک عنصر اقبال حیدرؔ کوں حضرت فاروق روکھڑی دے شاگرد ہوونْ دا شرف حاصل ہے۔اوہ سرائیکی شاعری دیاں تقریبََا ساریاں صنفاں تے دسترس رکھدن ۔ اوہ اپنْے ذاتی شعری مجموعیاں ’’کردے ہنجھوں‘‘ تے’’ اوکھے پندھ‘‘توں علاوہ ڈٖوجھے شعراء دے وی کئی انتخاب چھاپ چکے ہن۔عنصر اقبال حیدر اپنْی مقامی ادبی تنظیم ’’منْ دریا‘‘ علو والی دے جنرل سیکرٹری ہن، جیڑھے جو اپنْی تنظیم دے زیرِ اہتمام اکثر ادبی محافل منعقد کیتی رکھدن۔عنصر اقبال حیدر ؔ ہک انتہائی متحرک تے محنتی تخلیق کار ہن۔نمونہ کلام حاضر ہے۔

(1)غزل

محبت والیاں ریتاں نبھاونْ توں نہ ڈٖریا کر

کسے نوں اپنْے دل دیوچ وساونْ توں نہ ڈٖریا کر

جوانی چار ڈٖینہ دی ہئی اداواں نال لُٹّی رکھ

تے چُنری اپنْے دنداں وچ دباونْ توں نہ ڈٖریا کر

پوجاری حسن دے سارے تیڈٖے شاراں تے نچدے ہن

انہاندے دل نوں انگٖلیں تے نچاونْ توں نہ ڈٖریا کر

تیڈٖی مندری ، تیڈٖے چھلّے نشانی منگدے دل والے

اے مندری چھلے توں کہیں نوں پواونْ توں نہ ڈٖریا کر

بھلا مت ہئی اے حیدر ؔ دی وڈٖا کمزور دل ہوندائے

کسے ٹُٹے ہوئے دل نوں مناونْ توں نہ ڈٖریا کر

(2)غزل

اکھ دا اوندا اشارہ نندراں اُڈٖا گٖیا ہے

ملیا نہیں دوبارہ نندراں اُڈٖا گٖیا ہے

زلفاں نوں ڈٖیکے جھٹکے نبضاں او جام رکھدائے

بندہ ہے بٖہوں پیارا نندراں اُڈٖا گٖیا ہے

چن چوڈٖویں دا جڈٖاں بدلاں چوں جھات پاوے

مکھ توں نقاب اتارا نندراں اُڈٖا گٖیا ہے

ڈٖینہ انتظار دیوچ راتاں وی جاگٖ کٹیاں

ہے انج وی جھٹ گزارا نندراں اُڈٖا گٖیا ہے

حیدرؔ حسن دے جٖال اچ ایجھے اُلجھ گٖیوسے

پھس کے وی پر نہ مارا نندراں اُڈٖا گٖیا ہے

٭٭٭