ملک آڈھاؔ خان نطقال

ملک آڈھا خان نطقال 4اپریل 1944ء کوں ملک شیر محمد دے گھر گنجیال  ضلع خوشاب اچ پیدا تھئے ،عملی زندگی دا آغاز انہاں درس و تدریس توں کیتا تے نال دے نال زمیندارہ وی کریندے ہن۔آپدیاں مطبوعات ،رموزِ عشق،رازو نیاز تے سسی دے ڈوہڑے مشہور ہن۔عطا ء اللہ خان نیازی اپنی گلو کاری دا آغاز آڈھا خان دے ڈوہڑیاں توں کیتا تے بے شمار ڈوہڑے گائے جو بہوں مقبول تے مشہور تھئے۔

(1) غزل

اے سوہنے دے سوہنے خیالاں دی گل اے

سنے نہ سنے او بے حالاں دی گل اے

میں وی راہ تے بیٹھاں جو ڈکھڑا سنیساں

اے اج دی تاں نئیں کائی سالاں دی گل اے

بھانویں من چا ساڑے میں وت وی اُسے دا

اے تاں بھائی اوہدے کمالاں دی گل اے

میں تاں کئی نئیں پچھناں او جیویں کرے چا

محبت ہے اے کئی سوالاں دی گل اے؟

جیڑھے اُس  مرائے  ا  و پتھر  عجیب  ہن

صراف ای کئی جانے اے لعلاں دی گل اے

او کُہندا وی رہندے تے پیارا وی لگدے

محبت دی الٹی اے چالاں دی گل اے

توں چپ کر چا آڈھاؔ کسے نوں سنا نئیں

محبت دے لٹئے کنگالاں دی گل اے

(2) غزل

تری مست نگاہ دیوچ ماہی مری مدھم جھئی تصویر وی ہے

شالا خیر دی بھالیں وے ماہی ایدے نال مری تقدیر وی ہے

جداں ترچھی کر کے دید بھنوائیں تلوار وانگوں دل چیر ویندی

جے نال سلوک دے بھالیں چا مرے زخماں لئی اکسیر وی ہے

جدوں میت کے اکھیاں سو جاناں دکھ درد توں غافل ہو جاناں

ترے سوہنے سوہنے خواباں وچ مرے اُجڑن دی تعبیر وی ہے

کر سرخ نہ انہاں اکھیاں نوں، توں مئے چھلکا نئیں جام وچوں

مخمور اکھیں دا نیر ماہی اساں دکھیاں لئی او تیر وی ہے

کرو نظر کرم دی آڈھےؔ تے اس ہجر فراق دے کھا ہدے تے

جو مردے زندہ کرنے دی تری اکھیاں وچ تاثیر وی ہے

٭٭٭