ملتان اُتے ایرانی حملے

پانڈؤواں کنوں ایرانیاں دے حملے تئیں ملتان دی تاریخ خموش ہِے۔ ویلے دے کُراڑے پَردیاں نے خُدا معلوم کِتّی قہرمان تاجداراں دی سطوت تے شوکت کوں آپݨی جھولی وِچ لُکا رکّھیا ہِے۔ ایرانی تاریخ نال اِتّی پتہ لڳدا ہِے جو جہڑیلے شہنشاہ گشتاسپ دے شِین٘ہ جرنیل بہمن نے وادیٔ پنجاب اُتے حملہ کِیتا انّھاں ݙیہاڑیاں اِتّھاں راجہ کفند دی حکومت ہَئی۔ اُوں نے ایرانی فوجاں دا ڈَٹ کے مقابلہ کِیتا اَتے نہ صرف آپݨے مقبوضہ علاقیاں کوں ایرانی دست بُرد کنوں بچا گِھدّیا، بلکہ سیوستان تئیں دے وݙّے علاقے کوں کَھس کے آپݨی قلمرو وِچ رَلایا۔ اِین٘دے بعد راجہ ایند گدّی اُتّے ٻیٹھا۔ اُون٘دے زمانے وِچ ملتان ریاست اسکلندہ دا ٻہوں وݙا شہر ہَئی۔ اسکلندہ ملتان کنوں پنڄاہ میل جنوب کوں واقع ہَئی۔ اُون٘دے جنوب وِچ بانبیہ اَتے بھاٹیہ دے شہر اَباد ہَن۔ راجہ ایند دے بعد اُون٘دا پُتر راجہ راسل تخت اُتے ٻیٹھا، پَر ہالی اُوکوں ذری مُد لنگھی ہَئی جو ہِک ݙاڈھی غنیم نے حملہ کر کے اُون٘دے کنوں راج پاٹ کَھس گِھدّا۔ پَر اُون٘دا پُتر راج کمار برکما ریس وݙا صاحبِ اقبال اَتے بخت بیدار ثابت تِھیا۔ اُوں نے نہ صرف پِیؤ دے مقبوضاں علاقے دُشمن کنوں وَلائے بلکہ سارے ہند دا مطلق العنان فرمانروا بݨ ٻیٹھا۔

ٻِیا ݙیکھو

• مصریاں دا ݙوجھا حملہ۔
• ملتان اُتے اسائرس دا حملہ۔
• ملتان اُتے حملے۔

حوالے

۔