ملا دی کاوڑ

اج ہک ریڑھی آلے کنوں فاسٹ فوڈ گھنڑ سانگے ونج کھڑاں۔۔ پروں ہک موٹرسائیکل آلا زور دی آواز نال انتہائی بے سُرا جیہاں گاونڑ لائی ودا ہا ۔۔ گاونڑ کنوں ڈھیر موٹرسائیکل دے سائلنسر دا کڑواہ سر اچ درد گھتیندا پیا ہا تے سائلنسر کنوں زیادہ موٹرسائیکل سوار نوجواناں دی آپت اچ یاخڑ باخڑ دماغ خراب پئی کریندی ہئی۔۔ بہرحال جیہرلے او لنگھ گئین میں خدا دا شکر ادا کیتے جو جان چھٹی اے۔۔ میکوں ایں چیز دا اندازہ کینا ہا جو اتھاں وی محمود غزنوی ودا ہوسی۔۔ ریڑھی آلے یکدم میکوں آپ دو متوجہ کیتس۔۔ آکھیس بھائی یہ بتاو جہاں شیطان ہو وہاں رحمت کا فرشتہ آئے گا۔۔؟ صاف ظاہر ہے انکار کفر ہے ایں سانگے میں آکھیے کینا سئیں ۔۔ وت آکھیس اگر بندہ خود شیطان ہو تو۔۔ میں وت ای اوہو جواب ڈتے۔۔۔ آکھیس اے گاونڑ شیطانگی ہن۔۔ اے گاونڑ سنڑنڑ آلے دی فلانی جاہ اچ فلانی شئے پگھلا کے سٹی ویسی۔۔ میں دل اچ آکھیے جیکر سٹی ویسی تاں بس گالھ ختم اوندا مسئلہ اے آپ بھگیسی توں ہنڑ سر کھندی اوندا۔۔۔ اوں آکھیے اگیں ہک ریڑھی آلا اتھو ٹپیے گاونڑ لئی ودا ہا میں ہوکوں تڑہا چھوڑیے ۔۔ میں وی پہلے گاونڑ سنڑدا ہم وت ہدایت مل گئی اے۔۔ چھیکڑی میں ایں گالھ تے اتفاق کرنڑ دی کوشش کیتی اے جو اچی آواز اچ کشے نئیں سنڑنڑی چاہیدی تاکہ ایڈو اڈو لوک تنگ نہ تھیون۔۔۔ کینا ۔۔۔ اوں آکھیے سنڑن کیوں ؟ بھانویں ہینڈ فری وی لاون۔۔ اساں کینا سنڑن ڈیسوں۔۔ میں آکھیے لالا جیکر زبردستی انھیں کوں گاونڑ سنڑن کنوں روکنڑاں ہا تاں خدا خود چا روکے۔۔ اوں سزا رکھی اے۔۔ ایندا پِتہ وزن چیندے سزا بُھگیسی تہوں سنڑدا ودے۔۔۔ تیکوں ساہ ہے تاں توں وی سُنڑ۔۔ آکھیس اج دے نوجوان تیں آنگر گمراہ تھئے ودن۔۔ میں دل اچ آکھیے جیویں جناب اتھاں چوک تے مارشل لاء لئی کھڑن۔ (مظہر حسین)