مقناطیسی مندر

ابن ندیم یعقوب بن اسحاق کندی دے حوالے نال سورج مندر دے ہِک ذیلی بُت خانے دا ذِکر مِلدا ہِے جو اِیہ انّھاں سَت مندراں وِچوں ہِک ہِے جہڑے ہندوستان دے انجو انج جائیں اُتے واقع ہِن۔ اِیں مندر وِچ لوہے دا ہِک بُت ہِے، جین٘دا لَمباݨ سَتھ ہَتھ جیݙا ہِے۔ اِیہ سٹوپہ دے وِچالے وِچ معلّق ہِے، کیوں جو اِین٘دے چَون٘ہاں پاسوں مقناطیس آپݨی چِھک وِچ گِھدّی کھڑوتا ہِے۔ اِیہ مندر قلعے دی فصیل دے تَلّے واقع ہِے۔ اِین٘دی اُچائی 180 ہَتھ ہِے۔ ہندوستان کنوں عام یاتری پاݨی تے خشکی ہر پاسوں اِین٘دی زیارت کِیتے آن٘دے ہَن۔ آکھیا وین٘دا ہِے جو اِتّھاں کُئی ویلا اِیہو جیہاں نِھیں گُزردا جو لوک اِین٘دے درشناں کِیتے نہ آئے ہوئے ہووِن۔