معراج نامے
سرائیکی زبان دے شعری ادب وچ بے شمار شاعراں معجزئہ معراج کوں اپݨی شاعری دا موضوع بݨائے۔ اے معراج نامے باقاعدہ سرائیکی دی صنف بݨ تے صدیاں توں سرائیکی زبان دی شان ودھیندے پن۔ تحصیل صادق آباد دے ہک چانڈیہ قوم دے بزرگ حضرت میاں قبول تے دودے شاہ دے معراج نامے قدامت دے لحاظ نال چھیویں صدی ہجری دی نعتیہ شاعری دے نمونے ہن۔ قبول چھیکڑی عمر وچ حضرت پیر موسیٰ نواب دے مرید تھے ہن ۔ جو حضرت شیخ الاسلام بہاء الدین زکریاؒ ملتانی دے سوتر ہن تے جنھاں دا زمانہ 612ھ دے لڳ بھگ ہے۔(12)۔ قبول فقیر دے معراج نامے دا نمونہ (عربی تے فارسی دا ایں معراج نامے وچ کافی اثر ݙسدے)۔
سبھو راز در راز نکتہ بیاں
وہم آدمی دا کیا کرسی عیاں
سنبھالیں قبولا عقل ہوش کُن
نہیں جاہ تیݙی توں خاموش کُن
ڈھاں گھٹ لکھ ڳالھ کیتی خدا
نبی محمدؐ کوں ڈتس جزا
اُمت بخشا ول حبیب خدا
کنڈی ہلدی آہی پاݨی ویندا ہا
الٰہی بحرمت محمدؐ رسول
دیویں بخشی سیتی ایمانِ قبول
میاںقادر یار دا معراج نامہ 1237ھ وچ لکھیا ڳے ۔ حافظ محمد یار دا معراج نامہ مخمس دے انداز وچ ہے ۔ ایندے کل26بند ہن۔ ہر بند دا چھیکڑی مصرع ہکو ہے ۔ ’’توں اڳے فریاد میݙی یا محمدؐ مصطفیٰ‘‘ ایں معراج نامے وچ فضائل سیرت ‘ واقعہء ہجرت ‘ حضرت علیؓ دا ذکر ‘ واقعہ کربلا دے علاوہ یارانِ محمد مصطفیٰؐ داذکر وی وݙی تفصیل تے عقیدت نال کیتاڳے۔
توں نبی کونین سرور پاک سید مرسلین
دینِ روشن ‘ شانِ افضل توں پیغمبر آخرین
توں نبی سرتاج بہتر یا محمدؐ خاتمین
حوض کوثر دا توں ساقی ہر نبی دا پیشوا
توں اڳے فریاد میݙی یا محمد مصطفیٰؐ
حوالہ
[لکھو | ماخذ وچ تبدیلی کرو]کتاب: سرائیکی شاعری دا اِرتقاء، مصنف: ڈاکٹر نصراللہ خان ناصر، چھاپہ خانہ : جھوک پبلشرز ملتان