مظہر فرید
اصل ناں محمد مظہر
قلمی ناں مظہرؔ فرید
جمن 1983ء
تعلیم ایم اے (انگلش)
پیشہ تدریس
فون نمبر 03007487280
جاہ پتہ موضع عظمت پور ،وستی خان کالونی علی پور ضلع مظفر گڑھ
مظہر فرید دا تعلق گبول فیملی نال ہے، آپ علی پور دے ہک پڑھئے لکھئے با شعور شاعر ہن ۔اردو تے سرائیکی ڈوہائیں زباناں وچ شاعری کریندن۔کیوں جو آپ دی مادری زبان سرئیکی ہے تہوں اوہ زیادہ تر سرائیکی اچ طبع آزمائی کریندن تے سرائیکی دیاں تقریباََ ساریاں صنفاںلکھدن۔جڈاں جو غزل دے موڈ مزاج کوں خوب سمجھدن ،تے اوندے مزاج مطابق خوبصور ت غزل لکھدن۔
غزل
[لکھو | ماخذ وچ تبدیلی کرو]زمانہ گزریا میں انتظار اچ اجاں کھڑا ہاں
ہے مونجھ دی مے جیندے خمار اچ اجاں کھڑا ہاں
توں اپنی نیت دا نور گھن کے گزر گیا ہیں
میں اپنے عیبیں دے اعتبار اچ اجاں کھڑا ہاں
زلیخا ہئیں تاں نئیں کیوں تیڈے نین خواب ڈہدے
جے میں ہاں یوسف تاں کیوں بزار اچ اجاں کھڑا ہاں
میں ہک شگوفہ ہاں زندگی دی امید گھن کے
خزاں دے سینے لُکی بہار اچ اجاں کھڑا ہاں
چمکدے چہرے تے بلدے نیناں توں لُڑھدے لُڑھدے
میں ہنج دا قطرہ اوئیں قطار اچ اجاں کھڑا ہاں
غزل
[لکھو | ماخذ وچ تبدیلی کرو]ایہ وی شکرِ جو او فجریں ویلے چھاپ کھڑا گئے
میں رُل ویندا منزل دو کئی رستے چھاپ کھڑا گئے
میں سوچاں رب اوں چہرے کوں کیوی بھاہیں لیسی
او جیندی تصویر اچ اپنے جلوے چھاپ کھڑا گئے
اوں ڈینہ دا ہک بڈھڑی نور دی کات کتیندی پئی ہے
جئیں ڈینہ دا کئی چندر تے ونج کے چرخے چھاپ کھڑا گئے
اے وی سچ ہے اج دا ملاں کہیں گرداب اچ پھس گئے
اے وی سچ ہے کل دا ملاں فتنے چھاپ کھڑا گئے
مظہر تئیں آزاد کیتا ہے میکوں اوجھے ویلے
میڈے چار چفیروں کئی بند پنجرے چھاپ کھڑا گئے