مشتاق گاݙی دی اماں سیݨ دا پرسہ

لالہ بلال بزدار دی اطلاع تے اکھ ءچوں ہنجواں دی تندیر چُھٹ گئی ہے ۔ بے انتہا پیار کرنْ آلی ، ہر دم ہر ویہلے آئے گئےساریاں دا خیال رکھنْ آلی ہک مہان تریمت ۔ ایں وسیب دا المیہ ہے جو مرد دے ایں ڈاڈھے سماج ءچ تریمت دی سُنجانْ اوندے پیو، بھرا، پُتر اتے اوندے گھر آلے نال تھیندے ءِ پر میں پورے یقین نال آکھ سگداں جو وڈے مہان انسان سئیں فدا حسین گاڈی ، منظر گاڈی، الطاف گاڈی، مشتاق گاڈی تے انھاں دی دھیریں نیانْیاں دے پچھوں ایہو عظیم تریمت ہن جنہاں دی گہری سیانْیاں اکھیں ءچ محبت، سادگی تے حالات نال بِھڑ ونجنْ دی اینجھی طاقت ہائی جئیں ایں گھر کوں علم دی درسگاہ، طبقاتی، قومی تے جمہوری جدوجہد دا مرکز بنْا ڈتا۔ استاد فدا سئیں جیکر بے فکری نال سرائیکی وسیب ءچ ہفتیاں مہینیاں کم کریندے ہن تے پچھوں گھر دی فکر، بالاں دی فکر توں بے فکری دا سارا بار اپنْی گھر آلی دے مونڈھیاں تے چھوڑ تے آندے ہن جو میڈی سانجھ رلاونْ آلی بختاور ذال پچھوں سنبھال گھنسی۔۔۔۔۔۔ انہاں دا میڈے نال پیار، شفقت تے رنجکی کوں میں مردے دم تئیں نئیں بھُل سگدا۔ نہ انھاں دے ہتھ دی پکی روٹیاں بھاجیاں بھُلدن نہ گلے شکوے دی لمبی پارتاں۔۔۔۔۔ چھوٹے لا توں "اماں" دا ویہڑا تے چُلہانْے دے آسوں پاسوں پڑچھیاں دریاں اُتے بہہ تے کُنی پکنْ دی تانگھ ۔۔۔۔۔۔ اتوں سِنی لکڑیں دا دھواں ۔۔۔۔۔۔ تے کاوڑ ساری الطاف تے۔۔۔۔۔۔۔ نئیں بھُلدا امّاں ۔۔۔۔۔ ۔۔۔۔۔۔۔۔۔۔ منظر گاڈی، الطاف گاڈی، مشتاق گاڈی، برگیڈئر سئیں لالہ مشتاق گاڈی تے ساریاں گھر آلیاں کو اماں دے ٹُر ونجنْ دا افسوس اے۔ تہاڈے نال ایں ڈُکھ ءچ شامل ہاں۔ تہاڈا شہزاد عرفان