مشتاق کھوکھر

اصل ناں    مشتاق احمد

قلمی ناں    مشتاقؔ کھوکھر

جٖمنْ        1946ء

جاہ پتہ      2602/1جمال پورہ کالونی ملتان

’’مقصودہ بیگم میموریل ادبی ویلفئر ٹرسٹ‘‘ملتان دا چیئر مین مشتاقؔ کھوکھر صرف اپنْی تنظیم دا ای نہیں بلکہ پورے ملتان دیاں ادبی تنظیماں دا خلوصِ نیّت نال خدمت گزار تے متحرک کارکن نظر آندے۔جتھاں تے جیڑھے ویلے ملے کہیں نہ کہیں ادبی پروگرام دا کانڈھا(دعوت نامہ) پکڑا ڈٖیندے۔مشتاق صاحب اٹھدے بٖہندے ،ٹردے پھردے ،ہر ویلے اپنْے آپ کوں ادب دی خدمت واسطے وقف کیتا ہوئے۔ادبی پروگرام منعقد کرنْ دا شوق اوکوں جنون دی حد تک ہے۔آپ دا نمونہ کلام ملاحظہ کرو!

غزل

قبیح چہرے نشابر کھڑاند ڈٖسدی ہے

سچائی تے کوڑ دی ایہا بھڑاند ڈٖسدی ہے

ہے پنڈا زخمی تے پیریں تے ظلمی چھالے ہن

اگونہاں ٹرداں تاں پندھ اچ اڑاند ڈٖسدی ہے

اے کیجھاں دور ہے شاہانہ تنگ مفلس ہے

عوام اجٖ وی تاں گھانْی دا ڈٖاند ڈٖسدی ہے

نظر دے اوہے جو چہرن نظام بدلے کیا

اسمبلی ڈٖینْاں دی میکوں چھڑاند ڈٖسدی ہے

عجیب فرق ہے اچ جھک دا ایں زمانے وچ

مگر ازل توںاے مشتاقؔ راند ڈٖسدی ہے

٭٭٭