مشتاق رضا

شیخ محمد فاضل ساہی مشتاق رضا سرائیکی زبان دے ہک مہاندرے شاعر گزرین۔ آپ وستی کھوئیاں (چہکان) دیرہ اسماعیل خان وچ پیدا تھئے۔ آپ دا تعلق اتھوں دے ساہی خاندان نال ہے۔ مشتاق رضا علاقے دے ٻہوں وݙے زمیندار‘ ذیلدار تے ہک عالم فاضل شخص ہن۔ سرائیکی زبان دے ایں مایہ ناز شاعر ڈیرہ اسماعیل خان وچ شعر و ادب دے ذوق کوں ودھاوݨ پھیلاوݨ وچ ٻہوں وݙا کردار ادا کیتے۔ مشتاق رضا ݙوہڑے ‘ غزلاں ‘ کافیاں تے مذہبی شاعری دے علاوہ سوہݨی مہنیوال تے صاحباں مرزا دے قصے وی سرائیکی زبان وچ منظوم کیتے۔ مشتاق رضا 80سال سرائیکی شعر و ادب دی خدمت دے بعد 1928ء وچ وفات پاتی۔ آپ کوں صفِ اول دے سرائیکی شعراء وچ ڳنیا ویندے۔(76)

ݙوہڑہ

بگ وی بگے تے مہیں کالیاں کیویں پیونے رلّا

بگ چُݨ کھاندے مچھیاں جیویں مہیں کھاوݨ تلّا

جو دوست نہ تھیوی دشمن تے پیش نہ آنی اللہ

مشتاق مورکھ دی دوستی کن جیوں پاسا توں بھلّا

قصہ صاحباں مرزا وچوں انتخاب:

اشک عشاقاں ناز معشوقاں اَڄکل دی ڳل ناہیں

خلق خالق توں ظاہر ہویا ݙیندا عشق صلاحیں

رانجھا چاک مہیں دا ہوکے ݙھونڈھے کتر کاہیں

امیر القیس ہویا ہے مجنوں عشق جڳایاں بھائیں

تھل جل دے وچ فارغ کوئی دم ݙسدا ناہیں

عشق اس سن وچ ہر کوئی پھاتا چھوٹیاں وݙیاں تاہیں

مشتاق دا نینہہ شالا توڑ چڑھے عرض کراں تے بھندا ٻاہیں

سر سر باد خزاں جکھڑ توں اللہ جان بچاہیں

حوالہ

کتاب: سرائیکی شاعری دا اِرتقاء، مصنف: ڈاکٹر نصراللہ خان ناصر، چھاپہ خانہ : جھوک پبلشرز ملتان