مشتاق ثمر
1954ء تا 2019ء
مشتاق ثمرؔ دا تعلق ضلع لیہ دے قصبے پہاڑ پور نال ہا، آپ اپݨے زمانے دے قادرالکلام شاعر ہَن۔کوشش دے باوجود انہاندی صرف ہک غزل میݙے ہتھ اَئی ہے انہاندی حیاتی بارے دوست جسارت خیالی توں پچھیا تاں انہاں مرحوم دے ورثاء توں پچھ کے ݙسایا جو شناختی کارڈ دے بمطابق آپ 17نومبر1954ء کوں پیدا تھئے ، تے 14مارچ 2019ء کوں وفات پا ڳئے۔اللہ تعالٰی بخشش فرماوے۔ آمین۔ نمونہ کلام۔
غزل
[لکھو | ماخذ وچ تبدیلی کرو]میں جیندیں کفن اپݨاں سیتی ودا ہاں
مرݨ توں مرݨ پہلے نیتی ودا ہاں
میں تیراں دے نوکاں تے سینے کوں رکھ تے
محبت دی معراج کیتی ودا ہاں
میکوں کئی ستیسی تاں کے تئیں ستیسی
میں دردیں توں میدان جیتی ودا ہاں
تساں موت جیکوں سݙیندے ہَو لوکو!
محبت دی مئے ہے میں پیتی ودا ہاں
میکوں لوڑ کافور دی نئیں ذرا بھر
میں بے جان بُت بݨ تے بیتی ودا ہاں
میں مشتاقؔ ݙکھیں دی ابدی قبر وچ
دفن آپ کوں آپ کیتی ودا ہاں