مسیح اللہ جامپوری دی چنڳائی

زبان دی ترقی واسطے کمپیوٹر ٹیکنالوجی کوں وݙی حیثیت حاصل اے ، 11 جون 1990ء کوں اساں خانپوروں سرائیکی اخبار ݙینھ وار جھوک سرائیکی شروع کیتا تاں ہتھ نال کتابت تھیندی ہئی، کمپیوٹر ٹیکنالوجی آ ڳی ہئی پر اساں کنے اتنے وسائل نہ ہن، ول اساں 17نومبر 1994ء توں سرائیکی اخبار ملتان گھن آیو سے ، اتھاں کم ودھ ڳیا ہئی ، کتابت دے مسئلے وی زیادہ ہن، ول جھوک دے ایڈیٹر سئیں مسیح اللہ خان ڄامپوری اساکوں پیسے ݙتے جو کمپیوٹر دا انتظام کرو، اساں لہور ڳیوسے ، کمپیوٹر آلیںکوں آکھیا جو اساݙا مسئلہ سرائیکی ہے، سرائیکی دے پنج وادھو اکھر ہِن تساں اساکوں اے پروگرام بݨا ݙیو، اُنہاں کمپیوٹریں دی رقم کنوں تریھ ہزار روپے وادھو ڳھدے پر اُنہاں بے ایمانی اے کیتی جو اساکوں ݙسیے بغیر کمپیوٹر وچ چار سال دا ٹائم لا ݙتا ، چار سال بعد او پروگرام بلاک تھی ڳیا، اساں ݙاڈھی بھڄ دُھرک کیتی پر کجھ نہ بݨیا۔

جھوک دے بعد ملتان اچوں ارشاد امین دا اخبار ’’سُڄاک‘‘ وی شروع تھیا ، او وی سرائیکی رسم الخط ءِ چ لکھیندا ہا پر کجھ عرصہ بعد سڄاک بند تھی ڳیا تے کمپیوٹریں دے نال سرائیکی پروگرام وی ویندا رہ ڳیا۔ اساں کجھ عرصہ اردو آلے پروگرام تے گزارہ کیتی رکھیا ول لہور رہݨ آلے ہک سرائیکی نینگر عطا صَیب سرائیکی پروگرام بݨا تے اساکوں دان کیتا تے اساں کنوں ایندا معاوضہ وی نہ ڳھدا، ایندے بعد سرائیکی اڳواݨ سئیں فرید پیرزادہ ذاتی خرچ تے لہوروں ہک سرائیکی پروگرام ’’سرائیکا‘‘ بݨوایا تے اونکوں نیٹ تے سب واسطے عام کیتا، بر بدقسمتی نال او کامیاب نی تھی سڳیا ، ہُݨ گزارہ تاں تھیندا پے اصل سرائیکی پروگرام ضروری اے، کمپیوٹر ٹیکنالوجی دے نال نال اڄ سوشل میڈیا دا دور اے ، اڄ ہک نہؤں برابر موبائل سِم اِچ پوری کائنات سما ڳی اے ، اڄ سوشل میڈیا پرنٹ تے الیکٹرونک میڈیا توں وی اڳوں چلا ڳے، ایندی ریٹنگ بی بی سی تے وائس آف امریکہ توں وی زیادہ ہے، اڄ سرائیکی نوجوان سوشل میڈیا دے اُتے سرائیکی دی جنگ بھرپور انداز نال لڑدے پن تے میکوں خوشی اے جو میݙی وستی دھریجہ نگر دے نینگر سوشل میڈیا دی جنگ وچ اڳوں اڳوں ہن۔

حوالہ

کتاب: میݙی دھرتی، میݙے لوک ، مصنف: ظہور احمد دھریجہ ، ناشر: جھوک پبلشرز ، ملتان 2018ء