مرنال دیو کلکرنی

مرنال دیو کلکرنی
معلومات شخصیت
ڄم	21 جون 1968ء (57 سال)  پونے
رہائش	پونے
شہریت	بھارت
عملی زندگی
پیشہ	ادکارہ ،  فلمی ہدایت کارہ ،  ٹیلی ویژن اداکارہ
	IMDB پر صفحہ

مرنال دیو کلکرنی ہک بھارتی فلمی اداکارہ ہن، جنہاں دی وجہ شہرت ہندی زبان دا ٹی وی سیریل "سون پری" ہے۔ اوہ ہندی تے مراٹھی ٹی وی ڈرامیاں تے فلمیں وچ کم کریندیں ہن۔

ابتدائی زندگی تے شادی

مرنال دیو کلکرنی 21 جون 1968 کوں پونے، ہندوستان وچ ہک مراٹھی دیشستھا برہمن ٹٻر وچ پیدا تھئین۔ انہاں دے ماء پیو ڈاکٹر وجے دیو تے وینا دیو ہن۔ انہاں نے پونے یونیورسٹی توں لسانیات وچ ماسٹر ڈگری حاصل کیتی۔ انہاں دی ہک بھیݨ مدھورا وی ہے۔ 11 اپریل 2019 کوں، مرنال اپݨے پیو توں محروم تھی ڳئین، جیہڑے ٻہوں عرصہ بیمار رہے ہن۔

مرنال نے اپݨے بچپن دے یار روچر کلکرنی نال 1990 وچ شادی کیتی تے انہاں دا ہک پتر وراجس ہے، جیہڑا مراٹھی فلمی صنعت دا حصہ ہے۔

پیشہ ورانہ زندگی

مرنال دیو کلکرنی نے محض 16 سال دی عمر وچ مراٹھی ٹی وی سیریل "سوامی" وچ اداکاری نال اپݨے کیریئر دا آغاز کیتا۔ شروع وچ، اوہ اداکاری دے معاملے وچ زیادہ سنجیدہ نہ ہن تے فلسفہ وچ ڈاکٹریٹ دی ڈگری مکمل کرݨ دا ارادہ رکھدی ہن۔ پر اداکاری تے فنون لطیفہ دے مواقع انہاں دے سامݨے آندے رہے تے آخر کار 1994 وچ انہاں نے اداکاری کوں اپݨے پیشے دے طور تے اپݨا ڳھدا۔

انہاں نے ٹی وی سیریل "شری کانت" (سرت چندرا چٹرجی دے ناولاں تے مبنی) وچ اپݨی اداکاری نال پہچاݨ بݨائی۔ انہاں دے مشہور ٹی وی ڈرامیاں وچ "دی گریٹ مراٹھا"، "دروپدی"، "حسرتیں"، "میرا بائی"، "ٹیچر"، "کھیل"، "سپرش" تے "سون پری" شامل ہن۔ الفا مراٹھی چینل تے ٹی وی سیریل "اوانتیکا" وچ انہاں دے کردار کوں وݙی پزیرائی ملی۔

مرنال تاریخی کرداریں جیویں "دروپدی"، "اہیلیا بائی ہولکر"، "راما بائی" تے "جیجا بائی" ادا کرݨ کیتے وی مشہور ہن۔ اوہ 22 دے قریب ہندی ٹی وی شو کر چکیں ہن۔ انہاں نے ہدایتکاری دے منصوبیاں تے توجہ مرکوز کرݨ کیتے ٹی وی سیریل وچ اداکاری ترک کر ݙتی۔ انہاں نے کجھ اشتہارات وچ وی کم کیتا ہے۔

مرنال دیو کلکرنی نے مراٹھی دے نال نال بالی ووڈ فلمیں وچ وی کم کیتا ہے۔ انہاں نے ہندی ٹیلی ویژن سیریز "نور جہاں" وچ حبہ زنانی دا کردار نبھایا، جیہڑا 2000-2001 وچ ڈی ڈی نیشنل تے نشر تھیا۔

ہدایتکاری

مرنال کلکرنی نے مراٹھی فلم "پریم منجھے پریم منجھے پریم آستا" دی ہدایتکاری کیتی، جیندی کہاݨی انہاں نے خود لکھی ہئی۔ایندے بعد، انہاں نے مراٹھی تاریخی ڈراما "راما مادھو" دی ہدایتکاری وی کیتی۔

ایوارڈ

مرنال کلکرنی مندرجہ ذیل ایوارڈز جیت چکیے ہن:

• 2001 وچ مراٹھی فلم "جوڑی دار" (2000) وچ اپݨے کردار کیتے بہترین اداکارہ دا سکرین ایوارڈ۔
• فلم "تھانگ (دی کویسٹ)" کیتے نیشنل ایوارڈ۔