مرزا قربان علی بیگ قربان

ٹنڈو آغا حیدر آباد دے صرف ہک وݙے مرثیہ گودا پک اساکوں لڳے ۔ آپ دا ناں مرزا قربان علی بیگ ہئی آپ نے ’’مجالس المومنین‘‘ دے ناں نال مرثیے تے مجلس دا ہک مجموعہ تحریر کیتا۔ اے مخطوطہ سرائیکی تے اردو زبان وچ ہے ۔ایندا سن تالیف 1335ھ ہے۔ اے مخطوطہ انسٹیٹیوٹ آف سندھالوجی دے کتب خانے وچ محفوظ ہے۔ ڈاکٹر غلام علی الانہ نے کمال مہربانی نال اساکوں ایندے کجھ صفحات دی فوٹو کاپی عنایت فرمائی ہے۔ ایں مجموعہ وچ حمد ‘ نعت ‘ مرثیے ‘ خمسہ ‘ ݙوہڑے تے نثری مجالس شامل ہن۔ مرزا قربان علی بیگ دی زبان ٻہوں صاف ۔ رواں تے پُر اثر ہے ۔ نثر دے دوران ݙوہڑے بند شامل کیتے ڳن‘ کتھاہیں کتھاہیں نثر دے درمیان اردو زبان وچ بند وی تحریر کیتے ڳن۔

ݙوہڑہ ݙیکھو

نانی میݙی ہے فاطمہ زہراؓ ہاں دختر نبی عربی دی

شافع محشر آہدن میکوں تے زوجہ ہاں علیؓ دی

جیندے غم وچ کل مومن گریاں ہن ہاں مائی اوں ولی دی

ہر وقت بحر غم وچ روندی ہاں میں ݙکھی ستم رسیدی

ݙوہڑہ حضرت عباس ؑ

جے بازو میݙے سلامت رہندے کیوں شبیرؓ کوں کوئی مریندا

جے میں جیندا رہندا کربل وچ کیوں شمرا لوڑھ وسیندا

جݙاں بازو میں غریب دے کپئے میں ودا ہم پاݨی بھریندا

ہِم ارمان شبیرؓ ہکلا رہ ڳیا وداں ہُݨ تئیں ہتھ ملیندا

مرزا قربان دی نثر دی شعراں وانگوں پوتی پروتی ہے ‘ ہک نثری ٹکڑا ݙیکھو:

’’تفسیر لولاک کنوں عیاں ہے‘ جو سب پیدائش دا او ذیشان ہے ‘ اوندی ثناء ادا کرݨ میکوں کیا امکان ہے ۔ اِتھ عاجز زبان ہے ۔ ملک مقرب انبیائے مرسل ہر ہک نعت خوان ہے۔خمسہ:

واہ شان عجب ایں پاک دا ہے

جو باعث ارض افلاک دا ہے

ٻیا لقب اینکوں لولاک دا ہے

اِتھ کم نیں ادراک دا ہے

جو نعمت لکھے ایں پاک دا ہے

مدھوش عقل چالاک دا ہے

موقوف اتھاں ہر بات کرو

صلوٰۃ  پڑھ صلوٰۃ  پڑھو

حوالہ

کتاب: سرائیکی شاعری دا اِرتقاء، مصنف: ڈاکٹر نصراللہ خان ناصر، چھاپہ خانہ : جھوک پبلشرز ملتان