مرثیہ
محرم الحرام دے ݙینہاں وچ مجالس وچ ذاکرین، کربلا وچ پیش آوݨ والے واقعات کوں رواں، عام فہم انداز وچ پیش کریندے ہن اینکوں ذاکرین دی مجلس یا تقریر آکھیا ویندا ہے۔ سرائیکی وسیب وچ تقریر دی صورت وچ اتے نال نال قصائد پڑھݨ دا سلسلہ سالہا سال توں جاری ہے۔ روایت ہے جو سرائیکی مرثیے وچ نثر دا آغاز نامور مرثیہ گو شاعر غلام سکندر غلام نے کیتا تے ایندے توں بعد ٻئے شعراء نے نثر دا استعمال کیتا۔ انہاں مرثیہ نگاراں دا نثری انداز ہک ݙوجھے کنوں انڄ ہے۔ ’’سرائیکی مرثیے وچ نثر‘‘ جیندے تحقیق کار تے مؤلف ڈاکٹر مرید عارف ہن۔ سرائیکی نثر دے ابتدائی نمونیاں دے حوالے نال انہاں دی ایہ ہک اہم کتاب ہے۔ انہاں ایں کتاب وچ ۲۱ مرثیہ نگاراں دے مرثیے اتے نثری نمونے شامل کیتن۔ سرائیکی نثر دی ابتداء مذہبی کتاباں قرآن مجید دے ترجمے، مرثیہ گو شعراء دیاں تقریراں، واقعات کربلا دے بیانات توں ݙکھائی ݙیندے۔ ٻارہویں صدی ہجری وچ سرائیکی مرثیے وچ نثر دا رواج تھیندا ݙسدے۔
پروفیسر دلشاد کلانچوی آپݨی کتاب ’’سرائیکی اور اس کی نثر‘‘ دے صفحہ ۸۹ وچ تقریباً انہاں مرثیہ نگاراں دے حالات، کوائف اتے نثری نمونے درج کیتن۔ سید قاسم جلال نے وی سرائیکی نثر دے ابتدائی نمونے یکجا کیتے ہن۔ مرید عارف دی کتاب ’’سرائیکی مرثیے وچ نثر‘‘ کئی پہلو نال اہم ہے۔ مرثیے وچ نثر دے نمونیاں توں اسلوب بیاں تے لفظیات دے استعمال بارے اہم معلومات ملدن۔
مرثیہ سرائیکی ادب دی ہک قدیم صنف ہے جیندے وچ مرثیہ گو شاعراں نے نثر دا منڈھ ٻدھا۔ بھانویں جو ایہ نثر نمونہ جات تقریراں، واعظ، مجالس کوں جذبات ݙیوݨ کیتے خوبصورتی پیدا کریندن۔ پر ایہ سرائیکی نثر وچ مقفیٰ مسجع عبارات دا شکارہے۔ مولوی گل محمد عاشق ملتانی ملتان دے دلی دروازے اندر ۱۸۸۵ء وچ پیدا تھئے۔ انہاں سرائیکی مرثیہ وچ وݙا ناں پیدا کیتا۔ اہل بیت دے مصائب دا بیان، مقفیٰ نثر وچ کجھ ایں طرحاں ملدے۔
محبان حسینؓ روز عاشور سادات کیتے سخت ہا دوپہر دا وخت ہا
میدان کربلا وچ مبتلائے نبی دا لخت توڑے جو ریت گرم ہئی
حسینؓ سمجھیا تخت ہا نبی دا دل ربا کجا کربلا دی گرم ہوا کجا
’’چو گردوں فوجاں دا ہجوم ہے۔ وچ ہک مظلوم ہے، ہتھ وچ مہار ہے، روندا زارو زار ہے۔ سر سانگاں تے اسوار ہن۔ سروں ننگے پردہ دار ہن۔ کہیں سانگ اتے نوشاہ دا سر ہے تے کہیں سانگ تے قاسم رشک ماہ دا سر ہے۔‘‘
غلام سکندر غلام سرائیکی زبان دے قدیم شاعر ہن۔ ۱۸۱۸ء کوں وستی سیال تحصیل بکھر وچ پیدا تھئے۔ ۱۹۰۸ء وچ وفات پا ڳئے۔ انہاں دی ذاکری تقریر دا نمونہ ݙیکھو۔
’’حضرت امام حسین کربلا دوں روانہ تھیوݨ والے ہن۔ جتھاں امام عالی مقام دے نینگر پروانے آپ حضور دے نال ویندے پئین۔ اتھاں ہک ٻڈھا ضعیف آدمی وی نال ونڄݨ کیتے آپݨا منشا آ بیان کریندے۔ ٻس جیڑھے ویلے کمر ٻنھ کے سلام آن کیتس تاں حضرت فرمایا اے خوشحال، کمال ضعیفی کوں پہنتا ہویا اے۔ نہ جنگ دے ݙا داہیں نہ پندھ دے ݙا داہیں۔ نال ڄل کے کیا کریسیں۔ عرض کیتس مولا! بھانویں جنگ وچ مراں۔ بھانویں پندھ وچ مراں۔ تیݙے عاشقاں وچ تاں شمار تھیساں۔‘‘
’’سرائیکی مرثیے وچ نثر‘‘مرید عباس عارف دی تحقیقی کاوش ہے۔ انہاں آپݨی ایں کتاب راہیں نامور مرثیہ نگاراں دے کلام دے نال انہاںدی نثر دے نمونہ جات شامل کیتن۔ ایںکتاب وچ ۲۱ مرثیہ نگاراں دے مرثیے تے نثری نمونے شامل ہن۔
سرائیکی نثر دی ابتداء اتے ارتقاء دے سلسلے وچ ذاکرین اہل بیت دے نثری بیان، تقاریر، نثر پارے خصوصی اہمیت رکھدن۔
سرائیکی مرثیہ شعری اتے نثری روایت دے اعتبار نال ٻہوں قدیم صنف ہے۔ خلش پیر اصحابی دے کتابچے، ’’سرائیکی مرثیہ گوئی دے چار سو سال ۱۹۸۰ء سرائیکی مرثیہ گوئی دے ۵ سو سال، ملتانی مرچیہ ۱۹۸۶ء وچ شائع تھیاں۔ ’’نقیبان کربلا‘‘ صفدر حسین ڈوگر نے سرائیکی مرثیہ گو اتے مرثیہ خواں اصحاب دا تذکرہ ۱۹۹۳ء وچ شائع کیتا۔ ڈاکٹر سید صفدر حسین شاہ نے ملتانی مرثیہ دے عنوان نال ۱۹۹۰ء وچ ڈاکٹر اسلم ادیب دی نگرانی وچ تحقیق مقالہ لکھیا۔ جیندے وچ انہاں صنف مرثیہ، اقسام، ہیئت تے مرثیے دی غرض و غائیت دا جائزہ گھدا تے چھیکڑ وچ ڈاکٹر کرسٹو فرشیکل دی کتاب دا ترجمہ ’’ملتانی مرثیہ‘‘ کوں شامل کیتا۔
ڈاکٹر غضنفر مہدی نے آپݨے ڈاکٹریٹ دے وچ ۱۵۶ مرثیہ گو شعراء دے کوائف اتے کلام کوں یکجا کیتے۔ سرائیکی مرثیے دے حوالے نال کیفی جامپوری، ڈاکٹر نصر اللہ خان ناصر، حفیظ خان نے آپݨی تحقیق وچ سرائیکی نثر دے ابتدائی خدوخال بارے لکھیئے جو تیرہویں صدی ہجری وچ مرثیہ گو شعراء نے مرثیے وچ نوحہ، سلام، دفعہ، تقریر یعنی نثر اتے نظم کوں رواج ݙتا تاں ول ہݨ تک مجالس وچ نثر تے نظم ݙوہائیں اصناف اگتے ودھیاں۔
ملتان دے قدیم امام بارگاہ بارے، مجالس عزا داری دی روایت، تحقیق و ترتیب ڈاکٹر اجمل مہار ابن اکبر ہک اینجھی کتاب ہے جیندا موضوع سرائیکی مرثیہ ہے۔ ایں صنف توں سرائیکی ادب دی ابتداء تھیندی ہے۔ مرثیہ ملتان دی اتے وسیب دے ٻئے ٻہوں سارے شہراں دے قدیم امام بارگاہواں اتے مجالس عزاء وچ پڑھیا ویندے اتے اے روایت صدیاں توں آندی پئی ہے۔ سندھ، ملتان، ڈیرہ اسماعیل خان، جھنگ، بھکر، اُچ شریف، ڈیرہ غازیخان دے سادات خانداناں آپݨے عقائد اتے نظریات کوں مقبول عام کیتا جیندے نال مرثیے کوں فروغ ملیا۔ ایں تناظر وچ سرائیکی ادب دی تاریخ، صنف مرثیہ دے حوالے نال ایہ بنیادی تحقیق ہے۔ ایہ کتاب کل نو ابواب اتے مشتمل ہے۔ پہلا باب سندھ دے مذہبی جغرافیائی حالات، وادیٔ سندھ وچ مسلماناں دی آمد، وادیٔ سندھ اتے مسلماناں دے ابتدائی حملے، عہد بنو امیہ، بنو عباس اتے وادیٔ سندھ وچ شعیت دی ابتداء دے بارے احوال بیان کیتا ڳئے۔ ݙوجھے باب وچ وادیٔ سندھ دے اہل بیت دا تعارف کرایا ڳئے۔ تریجھے باب وچ ملتان دی سندھ کنوں علیٰحدگی، خاندان بنو سامہ کنوں اسماعیلیاں دی حکومت دے احوال کوں قلمبند کیتا ڳئے۔ چوتھے باب وچ امام باڑہ تے مجلس عزاء دے عنوان نال جیندے وچ عزاداری دی روایت، برصغیر دے امام باڑے اتے وادیٔ سندھ وچ عزاداری دے جائزے بارے معلومات ݙتیاں ڳیاں ہن۔ پنجویں باب وچ ملتان دے علوی اتے سادات دا تذکرہ ہے۔ چھینویں باب وچ سرائیکی کلچر اتے ملتان دی عزاداری، تعزیہ داری کوں بیان کیتا ڳئے۔ ستویں باب وچ ملتان وچ سادات، گردیز، خانداناں، محمود غزنوی دی ملتان وچ تباہ کاری، ملتان وچ قرامطیاں دے خاتمے دا احوال بیان کیتا ڳئے۔ اَٹھویں باب وچ ملتان دے قدیم امام باڑے دا تذکرہ حواشی، حوالہ جات ݙے تے لکھیا ڳئے۔
نویں باب وچ ملتان دے اہم علاقے قدیم امام باڑیاں آستانیاں دی تصاویر کوں شامل کیتا ڳئے۔ ملتان دے امام باڑیاں، مجالس عزاء دی روایت تناظر وچ ایہ تحقیقی کتاب سندی تحقیق ہے۔ ایں کتاب کوں سرائیکی ریسرچ سنٹر، بہاؤ الدین زکریا یونیورسٹی ملتان دی طرفوں ۲۰۰۴ء وچ شائع کیتا ڳئے تے ایں کتاب کوں حکومت پنجاب دی طرفوں وزارت اطلاعات، ثقافت، امور نوجواناں نے ایوارڈ عطا کیتا۔
دبستان کچھی:
کچھی (دریائے سندھ دی مشرقی کچھ یعنی بغل، کالا باغ توں مظفر گڑھ تئیں دا علاقہ) آپݨی علاجدہ شناخت رکھیندا ہے۔ اتھوں سرائیکی مرثیہ لکھݨ والے مہمان شاعر تھی گذرے ہن۔
بھکر توں تعلق رکھݨ آلے معروف شاعر صفدر کربلائی نے غلام علی لنگاہ، نذر حسین تُرک، بابا سید علی شاہ اتے شہزادہ خادم حسین چھینوی دے گم شدہ اتے منتشر کلام کوں کَٹھا کر تے ’’دبستان کچھی‘‘ دے ناں توں شائع کیتا ہے۔ ایندے توں قبل صفدر کربلائی، غلام سکندر خان غلام دے کلام کوں ’’لیر کیتراں خیمے‘‘ اتے سید غلام حسن تائب دے کلام ’’ثنائے مظہر العجائب‘‘ دے ناں توں مرتب کر چکے ہن۔ مرحوم شعراء دے کلام کوں تلاش کرݨا اتے ترتیب ݙیوݨا ٻہوں اوکھا کم ہے۔ تحقیق دے ایں اوکھے مرحلے وچ صفدر کربلائی سُرخرو تھئے ہن۔ مرثیہ سرائیکی ادب دی زمانہ قدیم توں ہݨ تئیں سب توں وݙی اتے توانا (تکڑی) صنف ہے۔ ایں وجہ کنوں سرائیکی رثائی ادب دی انڄ انڄ پچھاݨ ہے۔
مرثیہ سرائیکی ادب دی ہک وݙی صنف ہے۔ ایں صنف وچ لکھݨ والے چار شعراء، بابا سید علی شاہ چھینوی، مولوی نذر حسین تُرک، مولوی غلام علی لنگاہ تے شہزادہ خادم حسین چھینوی دے حالات زندگی اُتے انہاںدے کلام کوں صفدر کربلائی نے تحقیق و ترتیب ݙے تے ’’دبستان کچھی‘‘ دے ناں نال ۲۰۰۷ء وچ شیر ربانی پریس ملتان توں اردو سخن پاکستان دے تعاون نال شائع کیتے۔ ایں کتاب بارے محقق صفدر کربلائی لکھدن:
’’اردو وچ ݙو کتاباں ٻہوں اہم ہن ہک دبستانِ لکھنؤ (ابو للیث صدیقی)، دبستانِ دلی (نور الحسن ہاشمی) انہاں ݙو کتاباں کوں سامݨے رکھ تے ایں کتاب دا ناں ’’دبستان کچھی‘‘ رکھیا ڳئے۔ جینویں جو دبستان دلی تے دبستان لکھنؤ شاعری دے ݙو سکول آف تھاٹ ہن ایں طرح (دریائے سندھ دے مشرقی کچھ یعنی بغل، کالا باغ تے مظفر گڑھ دا علاقہ) آپݨی انڄ سنڄاݨ رکھدے اتے اتھاں مرثیہ دے مہان شاعر و فن ہن۔‘‘ (۳۲)
’’سرائیکی زبان اور اس کی نثر‘‘ (ایک مختصر تاریخی خاکہ) پروفیسر دلشاد کلانچوی کی اردو میں لکھی ہوئی سرائیکی ادب بارے آپݨی نوعیت پہلی کتاب ہے۔ جیڑھی ۱۹۸۲ء وچ مکتبہ سرائیکی لائبریری بہاولپور دی طرفوں شائع کیتی ڳئی۔ ایں کتاب وچ سرائیکی نثری ادب، سرائیکی نثر، عہد مغلیہ اتے سرائیکی زبان تحریک آزادی کنوں قیام پاکستان دے بعد تک دی تاریخ بیان کیتی ڳئی ہے۔ ایندے علاوہ سرائیکی نثری ادب، اصناف، نثری تراجم، سرائیکی مرثیے وچ نثر دا استعمال، سرائیکی افسانے، ناول، مضمون نگاری، سرائیکی نثر لکھݨ والے لکھاریاں دے کوائف بارے اہم معلومات مل ویندن۔ کہیں وی زبان دی ادبی تاریخ شاعری اتے نثر ݙوہائیں پکھاں نال مکمل تھیندی ہے۔
حوالہ
[لکھو | ماخذ وچ تبدیلی کرو]تاریخ ۔سرائیکی زبان وادب مصنف :خالد اقبال ۔مقبول گیلانی ۔ ناشر: جھوک پبلشرز,ملتان