مخدوم نوح ہالائی

لطف اللہ مخدوم نوح ہالائی، جنہاں دا لقب مخدوم نوح اتے پیو دا ناں نعمت اللہ ہئی، ارضِ سندھ دے مشہور بزرگ صوفیا وچ شمار تھیندے ہن۔ انہاں دا سلسلۂ نسب حضرت ابوبکر صدیق رضی اللہ عنہ توں جا ملدا ہے اتے انہاں دے جدِ اعلیٰ شیخ ابوبکر بوبک ضلع دادو وچ آباد تھئے۔ مخدوم نوح دی ولادت باسعادت 911ھ وچ ہالا، سندھ وچ تھئی اتے اللہ تعالیٰ نے انہاں کوں علمِ لدنی توں نوازا ہئی۔ او سندھ دے سرکردہ اولیاء کرام وچوں ہن، جیہڑے ہر شخص نال اوندے حال دے مطابق گفتگو فرمیندے اتے قرآنی آیات توں استدلال کریندے ہن۔ انہاں دے بیان کرݨ آلے معانی و مطالب توں جید علما وی متاثر تھیندے ہن۔ انہاں دیاں کرامات ٻالپݨ توں ہی ظاہر تھیوݨ شروع تھی ڳئیاں ہن، چنانچہ منقول ہے کہ پیدائش دے ستویں ݙینہہ انہاں نے اذان سݨ کے بزبانِ فصیح کلمۂ شہادت پڑھیا۔ ہک ٻئی روایت دے مطابق انہاں نے ہک درہم کوں مٹی لا کے خالص سونے وچ تبدیل کر ݙکھایا۔ مخدوم نوح نے ستاسی سال دی عمر وچ 27 ذو القعدہ 988ھ بمطابق 2 جنوری 1581ء کوں وصال فرمایا اتے انہاں دا مزارِ پرانوار ہالا کندی وچ زیارت گاہ خاص و عام ہے۔