مخدوم نوبہار سیری

مخدوم نوبہار سیری حضرت مخدوم رشید حقانی رحمتہ اللہ دے خاندان دے ہک نیک سیرت تے عاشقِ رسولؐ ‘اللہ دے نیک باہنے ہن۔ آپ دے والد صاحب دا ناں حضرت مخدوم کرم شاہ قریشی ہاشمی ہئی۔ مخدوم نو بہار دا شمار سرائیکی زبان دے ݙو ترائے وݙے نعت گو شعراء وچ تھیندے۔ آپ دا نعتیہ مجموعہ مولود نبی مختیار 1935وچ شائع تھیا۔ ایںنعتیہ مجموعہ وچ نعتیہ تورے ‘ نعتیہ سہرے تے مولود شامل ہن۔

مولود شریف

ذرا رُخ توں برقعہ اُٹھا کملی والے

ساکوں جلوہ اپݨا ݙکھا کملی والے

پڑھاں کیوں نہ صلّی علیٰ کملی والے

جو ہیں توں رسولؐ خدا کملی والے

گناہ والا ٻیڑا ہے بھنور وچالے

مہر سیتی کندھی تے لا کملی والے

ہاں مشتاق ڳالھیں تیݙیاں دا میں دلبر

ذرا ٻول مٹھڑا سُݨا کملی والے

خدا واسطے ساݙی امداد چا کر

نہیں کوئی تیݙے سوا کملی والے

اونکوں کیہاں خطرہ ہے ݙس نوبہار

جنھاں تیݙا کلمہ پڑھیا کملی والے

حوالہ

کتاب: سرائیکی شاعری دا اِرتقاء، مصنف: ڈاکٹر نصراللہ خان ناصر، چھاپہ خانہ : جھوک پبلشرز ملتان