مخدوم دیوان ولایت شاہ

مخدوم دیوان ولایت سید حضرت خواجہ غلام فرید دے ݙاڈھے پیارے مرید ہن۔ آپ دا تعلق اوچ شریف دے بخاری سادات نال ہئی۔ بخاری سید ہووݨ دے باوجود آپ حضرت خواجہ فرید سئیں دے مرید تھے۔ حضرت خواجہ فرید سئیں جیڑھے ویلے حج مبارک تے تشریف گھن ڳے تاں ولایت شاہ وی آپ دے نال ہن۔ آپ پیر دے رنگ وچ ایں رنگیج ڳے ہن کہ لباس ‘ چال ‘ ڈھال ‘ ٻول چال‘ سوچ فکر سب اپݨے پیر و مرشد دے انداز وچ نظر آوے ہا۔

مخدوم ولایت شاہ دی شاعری اتے وی حضرت خواجہ فرید دا اثر نشابر ہے۔ آپ انھاں دے رنگ وچ شاعری کریندے ہن۔ اوہے مضامین ‘ ہوے خیالات تے کافی اویہو صوفیانہ مزاج ہئی۔ مولوی خیر الدین صابر ملتانی ’’گنج عرفانی موسوم بہ دیوان لاثانی‘‘ دے ناں نال سید صاحب دا ہک دیوان چھپوایا ہئی۔ جیں وچ 109 کافیاں ہک بارہ ماسہ تے 63ݙوہڑے شامل ہن۔ نمونہ:

حال کنوں بے حال کیتا بُرے برہوں بروچل والے

الڑے زخم کللڑے پندھڑے کنڈڑے پیریں چھالے

پِیت پلیساں کنڈ نہ ڈیساں‘ کیجو ملݨ محالے

سید پیر فریدن بناں ہُݨ کون میݙے ݙکھ ٹالے

………

ہور نہیں ہے سوہݨاں ساڳی بھل نہ دلڑی بھولی

ہر ہر دے وچ یار دا جلوہ تھی ہر ہر دی گولی

پیر فریدالدین پیارے دل دی کھڑکی کھولی

سید بے حد کر شکرانہ چندر پیا وچ جھولی  

حوالہ

کتاب: سرائیکی شاعری دا اِرتقاء، مصنف: ڈاکٹر نصراللہ خان ناصر، چھاپہ خانہ : جھوک پبلشرز ملتان