مختیار مخلص

اصل ناں       مختیار حسین

قلمی ناں        مختیار مخلصؔ

جٖمنْ            1965ء

پیشہ             ملازمت(کیپکو)

فون نمبر        0345 3440525

جاہ پتہ          شیخ عمر، کوٹ ادو ضلع مظفر ڳڑھ

شعری مجموعہ ’’سدھ سنیہا‘‘ دے خالق مختیار مخلصؔ دی شاعری کتاب دے عنوان دے عین مطابق واقعی ہک پیغام ہے محبت دا ، انسان دوستی دا۔آپ دی شاعری ایویں لڳدی ہے جیویں کہیں مصلح صوفی دی شاعری ہووے ۔جیندے وچ امن تے اخلاقیات دا سنیہا وݙے خوبصورت پیرائے وچ ݙتا ڳئے۔مجال ئِ جو کتھائیں عشق و محبت یا محبوب دے لبٖ ورخسار دی ڳالھ کیتی ہووے ۔حالانکہ غزل اوہ صنف ہے جیندے وچ رومانی شاعری کیتی ویندی ہے،لیکن مخلص ؔ ایندے وچ وی مصلحانہ رنگ اختیار کیتے۔ نمونہ کلام حاضر ہے۔

(1)غزل

وقت کھنا نہ ، سوچ بقا دی

دنیا تاں ہے جھوک فنا دی

ماء ہے جنّت پیؤ دروازہ

سچّی اُلفت بھینْ بھرا دی

جیڑھا بٖئے دی خیر مناوے

کائنی اوکوں لوڑ دعاء دی

ہے قطمیر دا خاص حوالہ

ٹرسی جیکر ڳالھ وفا دی

جیڑھا مخلصؔ غیرت مند ہے

ڳالھ کریسی شرم حیا دی

غزل

جوفے دے وچ گار ہیں اسّاں

دین کنوں بے زار ہیں اسّاں

جیکر راہ دے خار ہیں اسّاں

سمجھیں بھوئیں تے بار ہیں اسّاں

خدمت نال خدا ہے ملدا

چوکھے خدمت گار ہیں اسّاں

رول کھڑے ہیں پیار محبت

کیجھیں دنیا دار ہیں اسّاں

آپ تڑاپی دور دے اندر

کیندے مخلصؔ یار ہیں اساں

؎حیاتی ہک تماشہ ہے

تماشہ بے تحاشہ ہے

توں جیکر سہ نی ݙے سڳدا

بدن بے کار لاشہ ہے

مگر دنیا توں بٖہوں سوہنْاں

خدا تیکوں تراشا ہے

٭٭٭