محمود کٹھیان
محمود کھٹیان 1852ء وچ پیدا تھئے۔ آپ دا اصلی وطن سبی بارکھان دا علاقہ ہے۔ بعد وچ آپ دا خاندان ڳوٹھ سلیمان کٹھیان ھالہ وچ آباد تھیا۔ آپ علی خان دے پتر ہن۔ آپ دی اماں سئیݨ دا ناں زرنار ہا اتے رند قوم نال تعلق ہانے۔ درمیانے طبقے وچ پیدا تھئے۔ ہِیں ڳالھوں پرورش چنگی طرحاں تھیوݨے ‘ چھوٹی عمر وچ والد صاحب دنیا توں ٹُر ڳے اَتے انہاں دی پرورش دا سارا بار انہاں دی اماں سئیݨ تے آن پیا۔ جنہاں پرورش کرݨ دا حق ادا کیتا۔ آپݨے چاچے بچل خان جیڑھے سدھے سادھے مست فقیر ہن نال ڈھیر پیار ہانے۔ آپݨی نانکی ٻولی بلوچی وی سکھیونے ۔ اتے ایں زبان وچ کافیاں اکھیونے۔ 25سال دی عمر وچ شادی کیتونے ‘ ساری حیاتی آرام دی گزریونے۔ چار پتر تے چار دھیاں ہانے۔ طبیعت دے خوش مزاج اتے کھلݨے ہسݨے ہن۔ ہِیں ڳالھوں شاعری دا ڈھیر حصہ مزاحیہ ہنے۔ مزاج سادہ ہا۔ کݙاہیں وی دولت مندتھیوݨ دی خواہش نہ ہانے کیتی۔ پڑھے لکھے نہ ہن۔ سیرسپاٹیاں دا ݙاڈھا شوق ہانے۔ ذہین ‘ حسن پرست اتے ڳاوݨ واڄاوݨ دے شوقین ہن۔ وفات دے بعد حاجی رترانی دے مقام تے دفن تھئے۔ آپ دا وصال 1907ء وچ تھیا۔
جوگی یار جادو لایا ‘ ݙاڈھا منڈ ماردا
تخت ہزارے دا ہے بادشاہ بالم
میں ہاں طالب تیݙی رب کوں ہے معلم
کھوہ پیا کھیڑا کھݙ وچ تھنب دوزخ فی النار دا
محی الدین مرشد ملیا جانی رب شافعی
چارے یار چوݙس پدھرے پنجتن پاکی
صدق کراں میں سر سارا میکوں قسم ہے ستاردا
جوگی کن چیر لایاں محبت ماراں
مرلی محمود وجدی تن وچ تاراں
بین برسا کھڑا ہے حسن دے ہزار دا
حوالہ
[لکھو | ماخذ وچ تبدیلی کرو]کتاب: سرائیکی شاعری دا اِرتقاء، مصنف: ڈاکٹر نصراللہ خان ناصر، چھاپہ خانہ : جھوک پبلشرز ملتان