محمد یوسف عابد

ج:1973ء

یوسف عابد دے اَبا سئیں دا ناں غلام فرید ہے ۔ آپ عابد تخلص کریندن ۔ یوسف عابد وستی حافظ آباد موضع بکھو عاربی اِچ پیدا تھئے ۔ شاعری 2000ء کنوں شروع کیتی اے ۔ ݙوہڑا ، غزل ، گیت تے کافی لکھدن ۔اپݨا کلام سفیر لاشاری سئیں کوں ݙیکھدے رہ ڳن۔

عابد ناز اَدا کر سڳدے

رب جو اونکوں وارا ݙتے

غزل

اوں جو کوڑا لارا ݙتے

اونکوں غیر اِشارہ ݙتے

اَکھیں رو رو راوی تھی ڳن

منہ ہنجھ کوں یار کنارا ݙتے

خوشیاں اوں کن کائناں ہوسن

ݙکھ اوں چوݨواں سارا ݙتے

رانجھݨ وانگیں رُلدا آیاں

رنگ پور ہیر نقارا ݙتے

عابدؔ ناز ادا کر سڳدے

رب جو اونکوں وارا ݙتے

(2)

یار سڄݨ جو پیارے ملیئے

عیش آرام ہِن سارے ملیئے

درد تندیراں چارے پاسوں

دل کوں سول کھپارے ملیئے

مِل تے دِلڑی خوش ہئی ݙاڈھی

کُوڑے توݨے لارے ملیئے

آکھیا ہَس چن تارے ݙیساں

جھولی وچ نگارے ملیئے

ݙکھ دریا ہے چھول دے اندر

نہ کہیں وقت کنارے ملیئے

کہیں دیاں اساں ماتم کیتا

کہیں دی آس کوں کھارے ملیئے

ہر کوئی ݙکھا عابدؔ وانگوں

ہر کوں ݙکھ سِر بارے ملیئے

حوالہ

کتاب احمد پور شرقیہ اِچ سرائیکی غزل دی ٹور، مصنف : عبدالباسط بھٹی ، ناشر : جھوک پبلشرز ، ملتان